پی ٹی آئی حکومت کے ساتھ مذاکرات میں سنجیدہ نہیں ، وزیر اطلاعات کا الزام

وفاقی وزیرِ اطلاعات و نشریات عطا اللہ تارڑ نے کہا ہے کہ مختلف گروہوں میں تقسیم پی ٹی آئی حکومت کے ساتھ مذاکرات کے لیے سنجیدہ نہیں ہے۔اسلام آباد میں مسلم لیگ (ن) کے رہنما زاہد خان کے ہمراہ پریس کانفرنس کرتے ہوئے انہوں نے اس بات پر زور دیا کہ مذاکرات ہونے چاہئیں لیکن پی ٹی آئی کو پہلے ریاستی اداروں کے خلاف اپنا منفی رویہ ترک کرنا ہوگا۔

وزیرِ اطلاعات نے افسوس کا اظہار کیا کہ پی ٹی آئی نہ تو عوام کی فلاح و بہبود میں دلچسپی رکھتی ہے اور نہ ہی سیاسی درجہ حرارت کم کرنا چاہتی ہے۔

انہوں نے کہا کہ خیبر پختونخوا میں پی ٹی آئی حکومت کے پاس تعلیم یا صحت جیسے کسی بھی شعبے میں اصلاحات لانے کا کوئی روڈ میپ نہیں ہے۔انہوں نے مزید کہا کہ خیبر پختونخوا میں طرزِ حکمرانی مفلوج ہو چکا ہے۔ خیبر پختونخوا کے مشیرِ اطلاعات شفیع جان کے ایک حالیہ بیان کا حوالہ دیتے ہوئے جس میں انہوں نے تحریک طالبان پاکستان کی واضح مذمت سے گریز کیا تھا عطا اللہ تارڑ نے دہشت گرد گروہ کی مذمت نہ کرنے پر اپوزیشن جماعت کو شدید تنقید کا نشانہ بنایا۔

عطا تارڑ نے عزم ظاہر کیا کہ پاکستان دہشت گردی کے خلاف جنگ جیتے گا۔انہوں نے مزید کہا کہ دہشت گردوں میں اب یہ صلاحیت نہیں رہی کہ وہ کسی بڑے ہدف کو نشانہ بنا سکیں۔

سال 2025 کے حوالے سے گفتگو کرتے ہوئے وزیرِ اطلاعات نے کہا کہ یہ سال ہر لحاظ سے پاکستان کے لیے کامیابیوں کا سال رہا ہے۔ انہوں نے اسے عسکری طاقت اور معاشی بحالی کا سال قرار دیا۔

معرکہ حق میں پاکستان کی فیصلہ کن فتح کا ذکر کرتے ہوئے انہوں نے کہا کہ اس حقیقت کی عالمی سطح پر تصدیق ہو چکی ہے کہ پاک فضائیہ نے بھارت کے سات لڑاکا طیارے مار گرائے تھے۔

انہوں نے بتایا کہ پاکستان اسٹاک مارکیٹ نئے ریکارڈ قائم کر رہی ہے جو ملکی معیشت پر سرمایہ کاروں اور کاروباری طبقے کے اعتماد کا عکاس ہے۔ انہوں نے مزید کہا کہ گزشتہ ماہ 3.6 ارب ڈالر کی ریکارڈ ترسیلاتِ زر موصول ہوئیں اور اس پر سمندر پار پاکستانیوں کو سراہا۔

ان کا کہنا تھا کہ زرمبادلہ کے ذخائر میں بھی اضافہ ہو رہا ہے اور ملک میں براہِ راست غیر ملکی سرمایہ کاری لانے کی کوششیں جاری ہیں۔

وزیرِ اطلاعات نے کہا کہ سنجیدہ سیاسی اور عسکری قیادت کی بدولت اب دنیا پاکستان کو بڑی عزت کی نگاہ سے دیکھتی ہے۔

دریں اثنا وفاقی وزیرِ دفاع خواجہ محمد آصف نے بھی پی ٹی آئی پر زور دیا کہ وہ حکومت کے ساتھ مذاکرات کے آغاز کے لیے اپنے رویے میں تبدیلی لائے۔اے پی پی کے مطابق ایک نجی ٹی وی چینل سے گفتگو کرتے ہوئے انہوں نے کہا کہ “خیبر پختونخوا حکومت کو دہشت گردی کے خلاف جنگ میں سیکورٹی اداروں کے ساتھ مکمل تعاون کرنا چاہیے۔انہوں نے مزید کہا کہ پی ٹی آئی کے گزشتہ دورِ حکومت کی کمزور پالیسیوں کی وجہ سے ہمیں صوبائی علاقوں میں دہشت گردی کا سامنا ہے۔ ان کا کہنا تھا کہ پی ٹی آئی رہنماؤں کو ماضی میں کی گئی غلطیوں کا اعتراف کرنا چاہیے۔

افغانستان کے ساتھ مذاکرات کے حوالے سے ایک سوال کے جواب میں خواجہ آصف نے کہا کہ پاکستان کو افغان حکام سے ایک تحریری دستاویز کی ضرورت ہے ،تاکہ ملک کو درپیش دہشت گردی کے مسائل کو مناسب طریقے سے حل کیا جا سکے۔