اسٹریٹجک مذاکرات سے قبل وزیرِ خارجہ اسحاق ڈار کی بیجنگ میں چینی قیادت سے اہم ملاقاتیں

نائب وزیراعظم اور وزیر خارجہ اسحاق ڈار نے اتوار کو بیجنگ میں اعلیٰ سطح کے چینی حکام کے ساتھ تفصیلی بات چیت کی، جہاں پاکستان اور چین ساتویں پاک چین وزرائے خارجہ اسٹریٹجک ڈائیلاگ کی تیاری کر رہے ہیں۔

دفترِ خارجہ کی جانب سے جاری کردہ ایک بیان کے مطابق اسحاق ڈار نے چینی ایگزیکٹو وائس پریمیئر ڈنگ شویشیانگ سے ملاقات کی، جس میں دونوں ممالک نے پاکستان اور چین کے درمیان ہمہ موسمی تزویراتی تعاون کی شراکت داری کو مزید مستحکم کرنے کے عزم کا اعادہ کیا۔ چینی جانب سے قومی مفاد کے بنیادی مسائل پر پاکستان کی غیر متزلزل حمایت کا بھی اعتراف کیا گیا۔

دونوں رہنماؤں نے دونوں ممالک کے درمیان سفارتی تعلقات کے 75 سال مکمل ہونے کے تاریخی سنگِ میل پر روشنی ڈالی اور اتفاق کیا کہ اس سالگرہ کو خاص طور پر چین پاکستان اقتصادی راہداری (سی پیک) کے فریم ورک کے تحت باہمی تعاون کو بڑھانے کے لیے ایک مستقبل بینی پر مبنی ایجنڈا ترتیب دینے کے لیے استعمال کیا جائے گا۔

دفترِ خارجہ کے مطابق وائس پریمیئر ڈنگ نے پاکستان کی قیادت اور عوام کو نئے سال کی مبارکباد پیش کی، جو دونوں ممالک کے مضبوط دوطرفہ تعلقات کی عکاسی کرتی ہے۔

ایک الگ ملاقات میں اسحاق ڈار نے چینی کمیونسٹ پارٹی (سی پی سی) کے انٹرنیشنل ڈیپارٹمنٹ کے وزیر لیو ہائیک سنگ سے بھی ملاقات کی۔

دونوں فریقین نے دوطرفہ تعلقات کی مستحکم رفتار پر اطمینان کا اظہار کیا، پارٹی کی سطح پر وفود کے تبادلوں، علاقائی صورتحال اور سی پیک کے مختلف منصوبوں پر پیش رفت کا جائزہ لیا۔ اس موقع پر سفارتی تعلقات کی 75 ویں سالگرہ کو ”شایانِ شان اور بامقصد طریقے سے“ مشترکہ طور پر منانے کے منصوبوں پر بھی تبادلہ خیال کیا گیا۔

اسحاق ڈار ہفتے کے روز بیجنگ پہنچے تھے ،تاکہ چینی وزیر خارجہ وانگ ای کے ساتھ اسٹریٹجک مذاکرات کی مشترکہ صدارت کریں، جس میں دوطرفہ تعاون کے تمام پہلوؤں کا جائزہ لینے اور شراکت داری کے نئے شعبوں کی نشاندہی کیے جانے کی توقع ہے۔

اس دورے میں پاک چین سفارتی تعلقات کی سال بھر جاری رہنے والی تقریبات کا آغاز بھی شامل ہوگا۔