وزیراعظم شہباز شریف اور یو اے ای کے صدر کے درمیان اقتصادی شراکت داری کے فروغ پر تبادلۂ خیال

وزیراعظم شہباز شریف نے منگل کے روز یہاں شیخ زاید پیلس میں متحدہ عرب امارات کے صدر شیخ محمد بن زاید النہیان سے ملاقات کی، جس میں دوطرفہ تعلقات کو مزید مضبوط بنانے، بالخصوص اقتصادی تعاون پر توجہ مرکوز کی گئی۔

وزیراعظم کے ہمراہ نائب وزیراعظم اور وزیر خارجہ سینیٹر اسحاق ڈار، وزیر اطلاعات عطا اللہ تارڑ، وزیراعظم کے خصوصی معاون طارق فاطمی اور دیگر سینئر حکام بھی موجود تھے۔

وزیراعظم آفس کی جانب سے جاری بیان کے مطابق دونوں رہنماؤں نے 26 دسمبر کو شیخ محمد بن زاید کے حالیہ دورۂ اسلام آباد کے دوران ہونے والی بات چیت میں پیش رفت کا جائزہ لیا، جو متحدہ عرب امارات کے صدر کی حیثیت سے پاکستان کا ان کا پہلا سرکاری دورہ تھا۔

وزیراعظم شہباز شریف نے پاکستان اور متحدہ عرب امارات کے درمیان دیرینہ برادرانہ تعلقات کو ایک اسٹریٹجک اور باہمی مفاد پر مبنی اقتصادی شراکت داری میں تبدیل کرنے کے عزم کا اعادہ کیا۔

انہوں نے دوطرفہ تجارت میں ”غیر معمولی اضافہ“ کی ضرورت پر زور دیا تاکہ اقتصادی تعاون کی مکمل صلاحیت کو بروئے کار لایا جا سکے۔

دونوں رہنماؤں نے انفارمیشن ٹیکنالوجی، توانائی، کان کنی اور معدنیات سمیت اہم شعبوں میں تعاون کے فروغ کے ساتھ ساتھ دفاعی تعاون پر بھی تبادلۂ خیال کیا۔

وزیراعظم نے شیخ محمد بن زاید کی قیادت میں متحدہ عرب امارات کی تیز رفتار ترقی کو سراہا اور دوطرفہ تعلقات کے فروغ میں ابوظبی کی مسلسل حمایت پر اظہارِ تشکر کیا۔ انہوں نے پاکستانی کمیونٹی کے کردار کو بھی سراہتے ہوئے کہا کہ متحدہ عرب امارات میں مقیم تقریباً 21 لاکھ پاکستانی دونوں ممالک کے درمیان تعلقات کو مزید مضبوط بنانے میں اہم کردار ادا کر رہے ہیں۔

دوطرفہ امور کے علاوہ دونوں فریقین نے باہمی دلچسپی کے علاقائی اور بین الاقوامی امور پر بھی تبادلۂ خیال کیا۔

یہ ملاقات پاکستان اور متحدہ عرب امارات کے درمیان اعلیٰ سطح کے متواتر روابط سے بھرپور ایک سال کے اختتام پر ہوئی، جو دونوں ممالک کے درمیان تعلقات میں بڑھتی ہوئی رفتار کی عکاسی کرتی ہے۔