قلات میں کارروائی کے دوران سیکیورٹی فورسز نے چار دہشت گرد مار ڈالے

سکیورٹی فورسز نے بلوچستان کے ضلع قلات میں خفیہ اطلاعات پر ٹارگٹڈ آپریشن کے دوران بھارت کی سرپرستی میں سرگرم تنظیم “فتنہ الہندستان” سے وابستہ چار دہشت گردوں کو ہلاک کر دیا۔

آئی ایس پی آر کے مطابق یہ کارروائی 27 دسمبر کو علاقے میں دہشت گردوں کی موجودگی کی مصدقہ اطلاعات پر کی گئی۔ آپریشن کے دوران سکیورٹی فورسز نے دہشت گردوں کے ٹھکانے کا سراغ لگا کر مؤثر انداز میں کارروائی کی۔ شدید فائرنگ کے تبادلے کے بعد چاروں دہشت گرد مارے گئے۔

ترجمان کے مطابق ہلاک دہشت گردوں کے قبضے سے اسلحہ، گولہ بارود اور دھماکہ خیز مواد کا بڑا ذخیرہ برآمد کیا گیا۔ آئی ایس پی آر نے بتایا کہ یہ دہشت گرد علاقے میں سکیورٹی فورسز اور اہم تنصیبات کو نشانہ بنانے سمیت متعدد دہشت گرد کارروائیوں میں ملوث رہے تھے۔

بیان میں مزید کہا گیا کہ علاقے میں کسی بھی ممکنہ خطرے کے خاتمے کے لیے کلیئرنس اور سینیٹائزیشن آپریشن جاری ہے۔ فوج نے وفاقی ایپکس کمیٹی کی منظوری سے نیشنل ایکشن پلان کے تحت “عزمِ استحکام” وژن کے عزم کا اعادہ کرتے ہوئے کہا کہ غیر ملکی سرپرستی میں ہونے والی دہشت گردی کے مکمل خاتمے تک کارروائیاں بلا تعطل جاری رہیں گی۔

صدرِ مملکت آصف علی زرداری اور وزیراعظم محمد شہباز شریف نے بلوچستان میں کامیاب انٹیلی جنس بیسڈ آپریشن پر سکیورٹی فورسز کو خراجِ تحسین پیش کیا۔

صدرِ مملکت نے دہشت گردوں کے ٹھکانوں کو مؤثر طریقے سے نشانہ بنانے اور چار بھارتی سرپرست دہشت گردوں کو ہلاک کرنے پر فورسز کی پیشہ ورانہ صلاحیتوں کو سراہا اور کہا کہ غیر ملکی مداخلت سے پھیلنے والی دہشت گردی کے خلاف جنگ پوری شدت سے جاری رہے گی۔

وزیراعظم شہباز شریف نے بھی ایک علیحدہ بیان میں سکیورٹی فورسز کی کامیابی کی تعریف کرتے ہوئے کہا کہ دہشت گردی کے خلاف جنگ میں فورسز نمایاں کامیابیاں حاصل کر رہی ہیں۔ انہوں نے کہا کہ پوری قوم اس جدوجہد میں مسلح افواج کے شانہ بشانہ کھڑی ہے۔

وزیراعظم نے ملک سے ہر قسم کی دہشت گردی کے خاتمے کے لیے حکومت کے غیر متزلزل عزم کا اعادہ بھی کیا۔