دیوان فاروق موٹرز نے چیف ایگزیکٹو آفیسر اور چیئرمین کا تقرر کردیا

دیوان فاروق موٹرز لمیٹڈ (ڈی ایف ایم ایل) نے غضنفر بابر صدیقی کو بورڈ آف ڈائریکٹرز کا چیئرمین اور وسیم الحق انصاری کو چیف ایگزیکٹو آفیسر (سی ای او) مقرر کیا ہے جس کا اطلاق آج یعنی جمعہ، 26 دسمبر 2025 سے ہوگیا ہے۔

لسٹڈ آٹو اسمبلر نے پاکستان اسٹاک ایکسچینج کو بھیجے گئے ایک نوٹس میں اس پیش رفت سے آگاہ کیا ہے۔

ڈی ایف ایم ایل کی ویب سائٹ پر دستیاب معلومات کے مطابق وسیم الحق این ای ڈی یونیورسٹی سے گریجویٹ مکینیکل انجینئر ہیں۔ وہ آٹوموبائل انڈسٹری میں 28 سال سے زائد کا متنوع تجربہ رکھتے ہیں اور فی الوقت دیوان فاروق موٹرز لمیٹڈ میں چیف آپریٹنگ آفیسر (سی او او) کے طور پر خدمات انجام دے رہے ہیں۔

اپنی موجودہ ذمہ داریوں میں وسیم الحق ٹیکنیکل لائسنس معاہدوں کے تحت کیا اور ہنڈائی برانڈز کی گاڑیوں کی اسمبلی کے مجموعی آپریشنز کے ذمہ دار تھے۔

دریں اثنا، بورڈ کے نو منتخب چیئرمین غضنفر بابر صدیقی دو ماسٹرز ڈگریوں کے حامل ہیں؛ جن میں جامعہ کراچی سے ایم ایس سی کیمسٹری اور دی انٹرنیشنل یونیورسٹی، انڈیپینڈنس، میسوری، امریکہ سے مارکیٹنگ میں ایم بی اے شامل ہیں۔

یوسف دیوان کمپنی کی ویب سائٹ پر دستیاب معلومات کے مطابق، صدیقی کے دوہرے تعلیمی پس منظر نے انہیں مصنوعات کے ایک متنوع پورٹ فولیو کے ساتھ کام کرنے کے قابل بنایا، جس میں پینٹس، کیمیکلز، فائبر، غذائی اجناس، پیٹرو کیمیکلز اور دیگر اشیاء شامل ہیں۔

انہیں مختلف کرداروں میں کام کرنے کا 25 سالہ تجربہ حاصل ہے، جس میں حکمت عملی تیار کرنے سے لے کر کمپنیوں کے انتظام تک شامل ہیں۔ وہ آئی سی آئی پاکستان لمیٹڈ کے مختلف پروڈکٹ لائنز کے انتظام میں 14 سال کا تجربہ بھی رکھتے ہیں۔

دیوان فاروق موٹرز لمیٹڈ (ڈی ایف ایم ایل) پاکستان میں ایک پبلک لمیٹڈ کمپنی کے طور پر 1998 میں قائم کی گئی تھی۔ یہ کمپنی پاکستان میں گاڑیوں کی اسمبلنگ، پروگریسو مینوفیکچرنگ اور فروخت کے شعبے میں سرگرم عمل ہے۔