ظفرالاسلام عثمانی پاکستان ریفائنری لمیٹڈ کے عبوری ایم ڈی اور سی ای او مقرر

ظفر الاسلام عثمانی کو پاکستان ریفائنری لمیٹڈ (پی آر ایل) کا عبوری منیجنگ ڈائریکٹر اور چیف ایگزیکٹو آفیسر (سی ای او) مقرر کردیا گیا ہے، ان کی تقرری کا اطلاق یکم جنوری 2026 سے ہوگا۔

لسٹڈ ریفائنری نے منگل کو پاکستان اسٹاک ایکسچینج کو بھیجے گئے اپنے ایک نوٹس میں اس پیشرفت سے آگاہ کیا۔

11 ستمبر 2025 کی سابقہ تشہیر کے تسلسل میں ہم مطلع کرنا چاہتے ہیں کہ پاکستان ریفائنری لمیٹڈ کے بورڈ آف ڈائریکٹرز نے ظفر الاسلام عثمانی کو کمپنی کا عبوری منیجنگ ڈائریکٹر اور سی ای او مقرر کیا ہے۔ اس تقرری کا اطلاق یکم جنوری 2026 سے ہوگا اور یہ اگلے حکم تک برقرار رہے گی۔

یہ پیشرفت زاہد میر کے ستمبر میں پاکستان ریفائنری لمیٹڈ کے مینیجنگ ڈائریکٹر اور سی ای او کے عہدے سے مستعفی ہونے کے بعد سامنے آئی ہے۔

پاکستان ریفائنری لمیٹڈ کی ویب سائٹ پر دستیاب معلومات کے مطابق ظفرالاسلام عثمانی نے متعدد بین الاقوامی اور مقامی کمپنیوں میں اعلیٰ عہدوں پر کام کیا ہے۔ وہ کیبل اینڈ وائرلیس جوائنٹ وینچر پاک ٹیل میں چیف آپریٹنگ آفیسر، ایکسن موبل جوائنٹ وینچر پاکستان میں چیف ایگزیکٹو آفیسر، پاکستان انٹرنیشنل ایئرلائنز کارپوریشن میں سینئر وائس پریذیڈنٹ کمرشل، پاکستان ٹیلی کمیونیکیشن کمپنی لمیٹڈ میں سینئر ایگزیکٹو وائس پریذیڈنٹ اور سی ایم پاک لمیٹڈ (زونگ) میں چیف آپریٹنگ آفیسر رہ چکے ہیں۔

ظفر الاسلام عثمانی کے پاس مجموعی طور پر 33 سال کا تجربہ ہے، جس میں سے 17 سال انہوں نے اعلیٰ سطح عہدوں پر گزارے ہیں۔ انہیں مینجمنٹ، حکمت عملی، منصوبہ بندی، مارکیٹنگ، سیلز، ڈسٹریبیوشن، کسٹمر سروسز اور فنانس کے شعبوں میں کام کرنے کا وسیع تجربہ حاصل ہے۔

عثمانی پاکستان اسٹیٹ آئل کمپنی لمیٹڈ کے چیئرمین کے طور پر چار سال سے زائد عرصے تک خدمات انجام دے چکے ہیں۔ انہوں نے لاہور الیکٹرک سپلائی کمپنی لمیٹڈ، جنکو ہولڈنگ کمپنی لمیٹڈ، پاکستان ٹیلی کمیونیکیشن کمپنی لمیٹڈ، چائنا موبائل پاکستان، موبل عسکری لبریکیٹس لمیٹڈ، آر اینڈ ڈی فنڈ اور انفارمیشن ٹیکنالوجی و ٹیلی کمیونیکیشن وزارت کے تحت یونیورسل سروس فنڈ کے بورڈ آف ڈائریکٹرز میں بھی خدمات انجام دی ہیں۔