کراچی کنگز نے پی ایس ایل کے 10 سالہ معاہدے کی تجدید کردی

کراچی کنگز نے پاکستان سپر لیگ (پی ایس ایل) کے فرنچائز حقوق میں مزید دس سال کی توسیع کر لی، جس سے ان کی لیگ کے ساتھ طویل المدت وابستگی مزید مضبوط ہوگئی۔

کراچی کنگز نے اپنے بیان میں کہا کہ یہ معاہدہ اس وقت حتمی شکل اختیار کر گیا جب ٹیم کے مالک سلمان اقبال نے پاکستان کرکٹ بورڈ (پی سی بی) کی تجدید کی پیشکش قبول کر لی، جس کے بعد فرنچائز آئندہ دہائی تک ایچ بی ایل پی ایس ایل کا حصہ رہے گی۔

سلمان اقبال پی ایس ایل کے ابتدائی سرمایہ کاروں میں شامل تھے۔ انہوں نے 2016 کے افتتاحی سیزن سے قبل اُس وقت لیگ کی مہنگی ترین فرنچائز کے حقوق حاصل کیے جب بین الاقوامی ٹیمیں پاکستان کا دورہ نہیں کر رہی تھیں۔

سلمان اقبال نے جاری بیان میں کہا 2015 میں ہم نے کرکٹ واپس لانے کے لیے قدم بڑھایا۔انہوں نے مزید کہا کہ ابتدائی سرمایہ کاری لیگ کی صلاحیت اور پاکستان کے کرکٹ مستقبل پر اعتماد کا اظہار تھی۔

انہوں نے کہاکہ ہم نے صرف ایک ٹیم نہیں خریدی، ہم نے ملک کی کرکٹ کی عظمت کی بحالی میں سرمایہ کاری کی۔

کراچی کنگز کے سی ای او طارق وصی نے تجدید کا خیرمقدم کرتے ہوئے کہا کہ فرنچائز نے چند برس میں مضبوط بنیاد قائم کی ہے۔

انہوں نے کہا ہم آئندہ دہائی کو نہ صرف کنگز بلکہ پورے پی ایس ایل کے نظام کے لیے ترقی اور پیشرفت کے نئے دور کے طور پر دیکھتے ہیں۔

طارق وصی کے مطابق ٹیم کی توجہ ایک مضبوط اسکواڈ کی تشکیل، مداحوں کے ساتھ تعلقات کو مزید مستحکم کرنے اور لیگ کے عالمی تشخص کو بہتر بنانے پر مرکوز ہے۔

فرنچائز نے کہا کہ پی سی بی کے ساتھ اس کی شراکت داری نے پی ایس ایل کو مضبوط بنانے میں اہم کردار ادا کیا ہے، خاص طور پر پاکستان میں بین الاقوامی کرکٹ کی واپسی کی کوششوں کے دوران کردار اہم رہا۔

کراچی کنگز نے مزید کہا کہ وہ ٹیلنٹ ڈیولپمنٹ میں بھی نمایاں کردار ادا کرتی رہی ہے، جس کے پلیٹ فارم سے کئی کھلاڑی قومی ٹیم تک پہنچے ہیں۔