کثیرالقومی فرموں نے اکتوبر 2025 میں پاکستان سے 385.6 ملین ڈالر منافع واپس منتقل کیا

اسٹیٹ بینک آف پاکستان کے بدھ کو جاری کردہ اعداد و شمار کے مطابق پاکستان میں سرگرم کثیرالقومی کمپنیوں نے اکتوبر 2025 میں 385.6 ملین ڈالر کا ایک سالہ بلند ترین منافع بیرون ملک اپنے ہیڈکوارٹرز کو بھیجا ہے۔

مرکزی بینک کے اعداد و شمار کے مطابق، موجودہ مالی سال 2025-26 کے پہلے چار ماہ (جولائی تا اکتوبر) میں غیر ملکی کمپنیوں نے مجموعی طور پر 1.14 ارب ڈالر بیرون ملک منتقل کیے، جو گزشتہ سال کے اسی عرصے میں 818.4 ملین ڈالر کے مقابلے میں 39 فیصد زیادہ ہے۔

اعداد و شمار کے مطابق ان چار ماہ میں سب سے زیادہ منافع بیرون ملک منتقل کرنے والی فرمیں چین، برطانیہ اور نیدرلینڈز کی تھیں، جو توانائی، مالیات، کاروباری خدمات، کمیونیکیشن، خوراک، دوا سازی اور تمباکو کے شعبوں میں کام کر رہی تھیں۔

اعداد و شمار کے تجزیے سے ظاہر ہوا کہ کثیرالقومی کمپنیوں نے مالی سال 26 کے پہلے چار ماہ میں سب سے زیادہ منافع چین کو 372.3 ملین ڈالر بھیجا، جس کے بعد برطانیہ کو 252.2 ملین ڈالر منتقل کیے گئے۔

اس کے علاوہ نیدرلینڈز کو 113.8 ملین، متحدہ عرب امارات کو 95.1 ملین، امریکہ کو 77.1 ملین، جرمنی کو 37.1 ملین، اور سوئٹزرلینڈ کو 35.4 ملین ڈالر بھیجے گئے۔

گزشتہ سال، سب سے زیادہ منافع حاصل کرنے والے ممالک کی فہرست میں بالترتیب برطانیہ، امریکہ اور چین شامل تھے۔

شعبہ وار منافع کی واپسی

پاکستان میں سرگرم غیر ملکی کمپنیوں نے توانائی کے شعبے میں سب سے زیادہ منافع اپنے ہیڈکوارٹرز کو منتقل کیا، جو چار ماہ میں 341.7 ملین ڈالر رہا، جس کے بعد مالیاتی شعبے میں کام کرنے والی کمپنیوں نے 226.7 ملین ڈالر بھیجے۔

پاکستان کے خوراک کے شعبے میں کام کرنے والی کثیرالقومی کمپنیوں نے اپنے ہیڈکوارٹرز کو 76 ملین ڈالر منتقل کیے۔

دوا سازی اور اوور دی کاؤنٹر ( او ٹی سی ) مصنوعات کی کمپنیوں نے اپنے ہیڈکوارٹرز کو 75 ملین ڈالر بھیجے۔ ٹیلی کام، انفارمیشن ٹیکنالوجی، اور ڈاک و کورئیر خدمات میں کام کرنے والی کمیونیکیشن فرموں نے 72.3 ملین ڈالر واپس منتقل کیے۔ تمباکو اور سگریٹ کے شعبے کی کمپنیوں نے مالی سال 26 کے پہلے چار ماہ میں 66.2 ملین ڈالر منتقل کیے۔

گزشتہ سال کے اعداد و شمار کے مطابق مالی سال 25 کے اسی چار ماہ میں خوراک، توانائی، اور مالیاتی شعبے کے فرمیں سب سے زیادہ منافع اپنے ہیڈکوارٹرز کو بھیجنے والے شعبے تھے، جیسا کہ مرکزی بینک کے اعداد و شمار سے ظاہر ہوتا ہے۔