وزیراعظم سرکاری دورے پر آذربائیجان پہنچ گئے

وزیر اعظم شہباز شریف جمعہ کو سرکاری دورے پر آذربائیجان کے دارالحکومت باکو پہنچ گئے، جہاں وہ تجارت اور سرمایہ کاری سمیت مختلف شعبوں میں تعاون کو مزید مضبوط بنانے پر بات چیت کریں گے۔

دفتر خارجہ کے مطابق وزیراعظم آذربائیجان کے صدر الہام علیئیف کی دعوت پر دورہ کر رہے ہیں اور باکو میں منائے جانے والے یومِ فتح کی پانچویں سالگرہ کی تقریبات میں بھی شرکت کریں گے۔

حیدر علیئیف انٹرنیشنل ایئرپورٹ پر وزیراعظم شہباز شریف کا استقبال آذربائیجان کے پہلے نائب وزیراعظم یعقوب ایوبوف، پہلے نائب وزیر خارجہ فاریز رزایف، پاکستان کے سفیر قاسم معین الدین اور سفارتی عملے کے ارکان نے کیا۔

اس موقع پر وفاقی وزیر اطلاعات و نشریات عطااللہ تارڑ بھی وزیراعظم کے ہمراہ ہیں۔

دورے کے دوران وزیراعظم شہباز شریف کی آذربائیجان کے صدر الہام علیئیف سے دوطرفہ ملاقات بھی ہوگی۔

دونوں رہنما دوطرفہ تعلقات کے تمام پہلوؤں کا جائزہ لیں گے اور تجارت، سرمایہ کاری، توانائی، دفاع، تعلیم اور علاقائی روابط سمیت مختلف شعبوں میں تعاون کے نئے مواقع تلاش کریں گے۔

دفتر خارجہ کے مطابق پاکستان اور آذربائیجان کے درمیان دیرینہ برادرانہ تعلقات موجود ہیں جو مشترکہ عقیدے، تاریخ، ثقافت اور باہمی اعتماد پر مبنی ہیں۔

بیان میں مزید کہا گیا کہ دونوں ممالک علاقائی اور بین الاقوامی تنظیموں بشمول اسلامی تعاون تنظیم (او آئی سی) ، اقتصادی تعاون تنظیم (ای سی او) اور اقوام متحدہ میں قریبی تعاون رکھتے ہیں۔

دفتر خارجہ کے مطابق وزیراعظم کا یہ دورہ آذربائیجان کی خودمختاری اور علاقائی سالمیت کے لیے پاکستان کی غیر متزلزل حمایت کی توثیق کرے گا اور دونوں برادر ممالک کے درمیان تزویراتی شراکت داری کو مزید مضبوط بنائے گا۔