بیکو اسٹیل نے واپڈا اور ڈسکوز کے منصوبوں کیلئے اسٹیل اینگلز کی سپلائی شروع کردی

بیکو اسٹیل لمیٹڈ نے واپڈا اور مختلف ڈسٹری بیوشن کمپنیز (ڈسکوز) کے منصوبوں کے لیے اسٹیل اینگلز کی سپلائی کا آغاز کر دیا ہے جو بجلی کے کھمبوں اور متعلقہ انفرااسٹرکچر میں استعمال ہوتے ہیں۔ یہ سپلائی بالواسطہ وینڈرز کے ذریعے کی جا رہی ہے۔

لسٹڈ اسٹیل ساز کمپنی نے یہ پیش رفت جمعہ کو پاکستان اسٹاک ایکسچینج (پی ایس ایکس) کو نوٹس میں شیئر کی۔

کمپنی کے مطابق اس پیش رفت سے اسے ان اداروں کی منظور شدہ وینڈر لسٹ میں شامل ہونے کا موقع ملے گا جس کے ذریعے یہ آئندہ توانائی اور انفرااسٹرکچر منصوبوں کے لیے براہ راست سپلائی فراہم کر سکے گی۔

بیان میں کہا گیا کہ اس پیش رفت سے کمپنی کی توانائی شعبے میں موجودگی مزید مضبوط ہوگی اور اس کے سیلز، منافع اور مجموعی مارکیٹ پر مثبت اثر پڑے گا۔

انتظامیہ نے اپنے عزم کو دوہرایا کہ وہ اپنی کسٹمر بیس کو بڑھانے، اعلیٰ معیار کے معیارات برقرار رکھنے اور ترقی کے مواقع تلاش کرنے پر کاربند رہے گی جو شیئر ہولڈرز کی قدر میں اضافہ کریں۔

بیکو اسٹیل لمیٹڈ، جو پہلے روی ٹیکسٹائل ملز کے نام سے جانی جاتی تھی، پاکستان میں ایک پبلک لمیٹڈ کمپنی کے طور پر رجسٹرڈ ہے اور اسٹیل مصنوعات تیار و فراہم کرتی ہے، جن میں ساختی اسٹیل اور فابریکٹڈ اجزاء شامل ہیں جو تعمیرات، توانائی اور صنعتی منصوبوں میں استعمال ہوتے ہیں۔

گزشتہ ماہ کمپنی نے اپنی کارروائیوں کو ڈیفارمڈ اسٹیل بارز کی پیداوار میں متنوع بنانے کے منصوبے کا اعلان کیا جو طویل مدتی توسیع اور ترقی کی حکمت عملی میں ایک اہم قدم ہے۔ کمپنی نے اس منصوبے کے تحت جدید اسٹیل فرنس اور کنٹینیوس کاسٹنگ مل نصب کرنے کا فیصلہ کیا ہے جس کی سالانہ پیداوار کی گنجائش 72 ہزار ٹن ری بارز ہوگی۔

مزید برآں کمپنی نے اپنی توسیعی حکمت عملی کے حصے کے طور پر 5 میگاواٹ سولر پاور پلانٹ قائم کرنے کے منصوبے کا بھی اعلان کیا۔

جولائی میں بیکو اسٹیل نے ہانگ کانگ، چین کو اپنی پہلی برآمدی کنسائنمنٹ کے طور پر کاپر انگاٹس کامیابی سے روانہ کیے جو کمپنی کی توسیعی منصوبہ بندی میں ایک اہم سنگ میل کے طور پر ریکارڈ کیا گیا۔