صدر زرداری کی امیرِ قطر سے ملاقات ، علاقائی تعاون اور سرمایہ کاری پر گفتگو

صدرِ آصف علی زرداری نے دوحہ میں ریاستِ قطر کے امیر شیخ تمیم بن حمد الثانی سے ملاقات کی، جس میں دوطرفہ تعاون کو مزید فروغ دینے اور خطے میں امن کی کوششوں پر تبادلہ خیال کیا گیا۔

صدرِ مملکت کے دفتر کے مطابق دونوں رہنماؤں نے پاکستان اور قطر کے تاریخی و برادرانہ تعلقات پر اعتماد کا اظہار کیا، جو مشترکہ ایمان، باہمی اعتماد اور مسلم دنیا میں امن و خوشحالی کے یکساں وژن پر مبنی ہیں۔

صدر زرداری نے حکومتِ پاکستان اور عوام کی جانب سے امیرِ قطر کو نیک خواہشات پہنچائیں اور شیخ تمیم کی قیادت میں قطر کی شاندار ترقی کو سراہا۔

انہوں نے قطر کے عالمی کردار، خصوصاً مذاکرات اور انسانی ہمدردی پر مبنی سفارت کاری میں اس کی خدمات اور غزہ کے عوام کے لیے جنگ بندی اور امداد کی حمایت کو قابلِ تعریف قرار دیا۔

پاکستان کی جانب سے یکجہتی کے اعادے کے ساتھ صدر زرداری نے کہا کہ اسلام آباد نے ہمیشہ بین الاقوامی فورمز پر قطر کا ساتھ دیا ہے۔

امیرِ قطر نے صدر زرداری کا خیرمقدم کرتے ہوئے پاکستان کی کامیابیوں پر فخر کا اظہار کیا اور قطر کی ترقی میں پاکستانی کمیونٹی کے کردار کو سراہا۔

انہوں نے کہا کہ قطر آئندہ برسوں میں ملک میں پاکستانی افرادی قوت میں نمایاں اضافہ چاہتا ہے۔

دونوں رہنماؤں نے سیاسی، اقتصادی، دفاعی اور ثقافتی شعبوں میں تعاون کے فروغ پر اتفاق کیا۔

صدر زرداری نے دفاع اور دفاعی پیداوار کے شعبے میں اشتراک بڑھانے کی پیشکش کی، جس پر امیرِ قطر نے مثبت ردِعمل دیتے ہوئے متعلقہ حکام کو پاکستان کے ساتھ مذاکرات شروع کرنے کی ہدایت کی۔

صدر زرداری نے زراعت اور غذائی تحفظ کے شعبوں میں مشترکہ منصوبوں کی تجویز بھی دی اور پاکستان میں قطری سرمایہ کاری کا خیرمقدم کیا۔

انہوں نے قطر فنڈ برائے ترقی اور ایجوکیشن ابوو آل فاؤنڈیشن جیسے اداروں کی تعلیم اور انسانی فلاح کے لیے کوششوں کو سراہا۔

صدر زرداری نے افغانستان کے حوالے سے اقوامِ متحدہ کی زیرِ قیادت دوحہ عمل میں قطر کے کردار کی تعریف کی، جس نے انسانی، ترقیاتی اور سلامتی کے امور پر بین الاقوامی تعاون کو فروغ دیا۔

امیرِ قطر نے امید ظاہر کی کہ پاکستان اور افغانستان موجودہ چیلنجز پر قابو پاتے ہوئے خطے میں استحکام کے لیے مل کر کام کریں گے۔

صدر زرداری نے امیرِ قطر کو پاکستان کے دورے کی دعوت دی، جسے شیخ تمیم نے قبول کرتے ہوئے کہا کہ وہ آئندہ سال کے اوائل میں پاکستان کا دورہ کریں گے۔

ملاقات میں چیئرمین پاکستان پیپلز پارٹی بلاول بھٹو زرداری اور پاکستان کے سفیر برائے قطر بھی شریک تھے۔