سلطان جوہر کپ: پاکستان اور بھارت کی جونیئر ٹیموں کا جذبۂ کھیل قابلِ تحسین

حال ہی میں کرکٹ میدان میں سامنے آنے والے ’ہینڈ شیک تنازع‘ کو پسِ پشت ڈال کر پاکستان اور بھارت کی جونیئر ہاکی ٹیموں نے منگل کے روز سلطان آف جوہر کپ کے میچ کے دوران عمدہ کھیل اور قابلِ تقلید اسپورٹس مین شپ کا مظاہرہ کیا۔

روایتی حریفوں کے درمیان یہ ہائی وولٹیج مقابلہ 3-3 گول سے برابر رہا۔ پاکستان کی جانب سے سفیان خان نے دو اور حنان شاہد نے ایک گول اسکور کیا۔

میچ کے آغاز پر دونوں ٹیموں کے کھلاڑی قومی ترانوں کے لیے قطار میں کھڑے ہوئے اور روایتی انداز میں ایک دوسرے کو ہائی فائیو دے کر خوش آمدید کہا، یہ منظر حالیہ کرکٹ مقابلوں میں نظر آنے والی کشیدگی سے بالکل مختلف تھا۔

2025ء کے ایشیا کپ اور آئی سی سی ویمنز ورلڈ کپ میں بھارتی کھلاڑیوں کو پاکستانی ہم منصبوں سے مصافحہ سے انکار پر تنقید کا سامنا کرنا پڑا تھا، جسے غیر اسپورٹس مینانہ اور سیاسی طور پر متاثرہ اقدام قرار دیا گیا۔

اس وقت کی رپورٹس میں کہا گیا تھا کہ بھارتی مردوں کی ٹیم نے نئی دہلی کی ہدایات پر یہ رویہ اپنایا تھا، جب کپتان سوریہ کمار یادو نے 14 ستمبر کو یو اے ای میں ایشیا کپ میچ کے بعد پاکستانی کپتان سے مصافحہ کرنے سے گریز کیا۔

یہ طرزِ عمل بعد کے میچوں (21 اور 28 ستمبر) اور پھر 5 اکتوبر کو کولمبو میں خواتین کے ٹورنامنٹ میں بھی دہرایا گیا۔

تاہم منگل کو جوہر باہرو میں جونیئر ہاکی کھلاڑیوں نے باہمی احترام اور کھیل کے جذبے کی ایسی تازہ مثال قائم کی جس نے کرکٹ میدانوں میں پیدا ہونے والے مصافحے کے تنازعے کو پس منظر میں دھکیل دیا۔