روشن ڈیجیٹل اکاؤنٹ: ستمبر میں 20 فیصد اضافے سے 196 ملین ڈالر موصول

سمندر پار پاکستانیوں نے ستمبر 2025 کے دوران روشن ڈیجیٹل اکاؤنٹس (آر ڈی اے) کے ذریعے 20 فیصد اضافے سے 196 ملین ڈالر کا زرمبادلہ ملک ارسال کیا۔ اگست میں 164 ملین ڈالر کا زرمبادلہ ملک ارسال کیا گیا تھا۔

اسٹیٹ بینک آف پاکستان کے مطابق ستمبر کی کل ترسیلات میں سے اب تک 19 ملین ڈالر واپس بھیجے جاچکے ہیں جب کہ 117 ملین ڈالر کو مقامی طور پر استعمال کیا گیا ہے۔

مرکزی بینک کے مطابق روشن ڈیجیٹل اکاؤنٹس کی کل تعداد 862,357 تک جاپہنچی ہے جو اگست کے آخر میں 851,756 تھی، یعنی ایک ماہ کے دوران 10 ہزار 601 نئے اکاؤنٹس کھولے گئے۔

اسٹیٹ بینک کے جاری کردہ اعدادوشمار کے مطابق گزشتہ ماہ کے اختتام تک روشن ڈیجیٹل اکاؤنٹ میں مجموعی طور پر 11.11 ارب ڈالرز موصول ہوچکے ہیں جس میں سے اب تک1.878 ارب ڈالر واپس بھیجے جاچکے ہیں جب کہ 7.118 ارب ڈالر مقامی سطح پر استعمال ہوئے ہیں۔

نتیجتاً ستمبر کے آخر تک کل قابل واپسی واجبات 2.112 ارب ڈالر تک پہنچ گئے ہیں۔

کل واجبات میں سے 1,469 ملین ڈالر نئے پاکستان سرٹیفکیٹس کے تحت ہیں جن میں 490 ملین ڈالر روایتی این پی سیز اور 979 ملین ڈالر اسلامی مالیاتی آلات شامل ہیں۔

اسی طرح اسٹیٹ بینک کے مطابق 495 ملین ڈالر روشن ڈیجیٹل اکاؤنٹس میں بیلنس کے طور پر موجود ہیں۔

ادھر، روشن ایکویٹی انویسٹمنٹس 95 ملین ڈالر پر پہنچ گئی ہیں، جو ماہانہ بنیاد پر 16 فیصد اضافہ ظاہر کرتی ہے۔

پس منظر

آر ڈی اے پاکستان کے لیے زرمبادلہ کی آمد کا ایک اہم ذریعہ ہے۔

یہ اقدام اسٹیٹ بینک کی جانب سے ستمبر 2020 میں شروع کیا گیا تھا ۔