پی سی بورڈ نے ایف ڈبلیو بی ایل کی نجکاری کیلئے حوالہ قیمت تجویز کر دی

پرائیویٹائزیشن کمیشن (پی سی) بورڈ نے جمعے کے روز فرسٹ ویمن بینک لمیٹڈ (ایف ڈبلیو بی ایل) کی نجکاری کے لیے حوالہ قیمت (ریفرنس پرائس) تجویز کرتے ہوئے اسے کابینہ کمیٹی برائے بین الحکومتی تجارتی لین دین ( سی سی او آئی جی سی ٹی) کو ارسال کر دیا ہے، جس سے یہ معاملہ متحدہ عرب امارات (یو اے ای) کے ساتھ ممکنہ حکومت اور حکومت کے درمیا ( جی ٹو جی ) معاہدے کی سمت ایک قدم مزید آگے بڑھ گیا ہے۔

کمیشن کی جانب سے جاری بیان کے مطابق یہ فیصلہ جمعے کو پرائیویٹائزیشن کمیشن کے چیئرمین محمد علی کی زیرصدارت کمیشن کے 240 ویں اجلاس میں کیا گیا ہے۔

فرسٹ ویمن بینک لمیٹڈ، جو 1989 میں قائم ہوا، میں حکومتِ پاکستان کا 82.64 فیصد حصہ ہے۔ بینک اس وقت انٹر گورنمنٹل کمرشل ٹرانزیکشنز ایکٹ 2022 کے تحت یو اے ای کی نامزد کردہ ایک کمپنی کے ساتھ مذاکرات میں مصروف ہے۔

کمیشن نے کہا ہے کہ اس عمل کی کامیاب تکمیل نہ صرف ملک میں غیرملکی براہِ راست سرمایہ کاری ( ایف ڈی آئی ) کو فروغ دے گی بلکہ پاکستان کے وسیع تر نجکاری پروگرام پر سرمایہ کاروں کے اعتماد میں بھی اضافہ کرے گی۔

ایک اور اہم فیصلے میں بورڈ نے رائیفائزن کی قیادت میں قائم کنسورشیم کو حیدرآباد الیکٹرک سپلائی کمپنی (حیسکو) اور سکھر الیکٹرک پاور کمپنی (سیپکو) کی مجوزہ نجکاری کے لیے مالیاتی مشیر کی تقرری کی غرض سے سرفہرست بولی دہندہ ( ٹاپ رینکڈ بڈر) کے طور پر منظور کر لیا ہے۔

مزید برآں کنسورشیم کے ساتھ فنانشل ایڈوائزری سروسز ایگریمنٹ (ایف اے ایس اے) کو حتمی شکل دینے کے لیے ایک مذاکراتی کمیٹی بھی تشکیل دی گئی ہے۔

کمیشن نے اس عزم کا اعادہ کیا کہ وہ ملک کی معاشی منظرنامے کو مستحکم کرنے اور پائیدار سرمایہ کاری کو فروغ دینے کے لیے شفافیت، کارکردگی اور اصلاحات کے ایجنڈے پر پوری سنجیدگی سے عمل پیرا رہے گا۔