سدرہ امین آئی سی سی ویمنز پلیئر آف دی منتھ کے لیے نامزد

پاکستان ویمن کرکٹ ٹیم کی اوپنر سدرہ آمین کو ستمبر کے لیے آئی سی سی ویمنز پلیئر آف دی منتھ ایوارڈ کے لیے شارٹ لسٹ کر لیا گیا ہے۔ یہ نامزدگی جنوبی افریقہ کے خلاف ہوم ون ڈے سیریز میں ان کی شاندار بیٹنگ کارکردگی کے پیشِ نظر کی گئی۔

32 سالہ بلے باز تین میچوں پر مشتمل سیریز میں سب سے زیادہ رنز بنانے والی کھلاڑی رہیں، جہاں انہوں نے 293 رنز کی غیر معمولی اوسط کے ساتھ اسکور کیے۔ انہوں نے ابتدائی دو میچوں میں بالترتیب 121 ناٹ آؤٹ اور 122 رنز کی مسلسل سنچریاں بنائیں جبکہ تیسرے میچ میں ناقابل شکست 50 رنز کا اضافہ کیا۔ ان کی مسلسل کارکردگی نے پاکستان کو ایک مضبوط جنوبی افریقی ٹیم کے خلاف سیریز میں مسابقتی پوزیشن میں رکھا۔

سدرہ آمین کے ساتھ بھارت کی نائب کپتان سمرتی مندھانا اور جنوبی افریقہ کی تزمین بریٹس بھی خواتین کے ایوارڈ کے لیے نامزدگی کی دوڑ میں شامل ہیں۔ مندھانا نے آسٹریلیا کے خلاف چار ون ڈے میچوں میں 308 رنز بنائے، جن میں ایک ریکارڈ 50 گیندوں پر سنچری بھی شامل ہےجبکہ بریٹس نے پاکستان کے خلاف مسلسل میچوں میں 101 اور 171 رنز کی اننگز کھیل کر پلیئر آف دی سیریز کا اعزاز حاصل کیا۔

مردوں کی کیٹیگری میں بھارت کے ابھشیک شرما اور کلدیپ یادیو کے ساتھ زمبابوے کے برائن بینیٹ کو بھی شارٹ لسٹ کیا گیا ہے۔ شرما نے ایشیا کپ میں 314 رنز اسٹرائیک ریٹ 200 کے ساتھ اسکور کر کے پلیئر آف دی سیریز کا اعزاز حاصل کیا جبکہ کلدیپ یادیو 17 وکٹوں کے ساتھ ٹورنامنٹ کے ٹاپ وکٹ ٹیکر رہے۔

دوسری جانب برائن بینیٹ نے آئی سی سی ٹی ٹوئنٹی ورلڈ کپ افریقہ کوالیفائر سمیت نو ٹی ٹوئنٹی میچوں میں مجموعی طور پر 497 رنز بنائے، جن میں تین نصف سنچریاں اور ایک سنچری شامل ہے۔

ایوارڈ کے فاتحین کا فیصلہ آئی سی سی ووٹنگ اکیڈمی اور دنیا بھر کے شائقین کے ووٹوں کی بنیاد پر کیا جائے گا۔ ووٹنگ اکیڈمی میں صحافی، نشریاتی ماہرین، سابق کھلاڑی اور ہال آف فیم ارکان شامل ہیں، جن کے ووٹوں کا وزن 90 فیصد ہو گا جبکہ شائقین کے ووٹ 10 فیصد حصہ رکھیں گے۔ ووٹنگ آئی سی سی کی ویب سائٹ icc-cricket.com/awards پر جاری ہے اور نتائج کا اعلان اکتوبر کے دوسرے ہفتے میں کیا جائے گا۔