تعلیمی نظام کو جدید دور کے تقاضوں سے ہم آہنگ کیا جائے گا، وزیراعظم

وزیراعظم محمد شہباز شریف نے کہا ہے کہ حکومت کی اولین ترجیح تعلیمی نظام کو مؤثر اور جدید تقاضوں کے مطابق بنانا ہے تاکہ نئی نسل سائنسی اور تکنیکی میدانوں میں دنیا کے ساتھ مقابلہ کر کے وطن کا نام روشن کر سکے۔

عالمی یومِ اساتذہ کے موقع پر اپنے پیغام میں وزیراعظم نے کہا کہ آج پاکستان دنیا کے دیگر ممالک کے ساتھ مل کر اساتذہ کی خدمات کو خراجِ تحسین پیش کرتا ہے۔ انہوں نے کہا کہ عالمی سطح پر اساتذہ کے لیے ایک دن مخصوص کرنا نہ صرف پاکستان بلکہ دنیا بھر میں ان کی خدمات کے اعتراف کا موقع فراہم کرتا ہے۔

انہوں نے کہا کہ اس سال عالمی یومِ اساتذہ 2025 کا موضوع ری کاسٹنگ ٹیچنگ ایز اے کولیبیریٹو پروفیشن ہے، جس کا مقصد دنیا بھر میں اساتذہ، تعلیمی اداروں اور تعلیمی نظاموں کے درمیان ہم آہنگی کو فروغ دینا ہے۔

شہباز شریف نے کہا کہ بہترین اور جدید تعلیمی نظام ہی ملک و قوم کی انفرادی اور اجتماعی صلاحیتوں میں اضافہ کر سکتا ہے اور سرکاری پالیسیوں و نظام میں بہتری لا سکتا ہے۔ انہوں نے کہا کہ قوموں کی ترقی میں اساتذہ کا کردار فیصلہ کن حیثیت رکھتا ہے، کیونکہ نوجوان نسل کی ذہنی و فکری تربیت اور سائنسی صلاحیتوں کی بنیاد انہی کی محنت سے استوار ہوتی ہے۔

وزیراعظم نے مزید کہا کہ اساتذہ، والدین اور معاشرے کا مثبت کردار ہی قوم کی ترقی و خوشحالی کی ضمانت ہے۔ انہوں نے کہا کہ حکومتِ پاکستان اور صوبائی حکومتیں اساتذہ کی فنی صلاحیت بڑھانے اور ان کی معاشی فلاح کو اپنی ذمہ داری سمجھتی ہیں، جبکہ ان کے حقوق کا تحفظ بھی اولین ترجیح ہے۔