فلپائن میں زلزلے سے ہلاکتوں کی تعداد 69 ہو گئی

فلپائن کے وسطی حصے میں منگل کی شب آنے والے 6.9 شدت کے زلزلے میں ہلاکتوں کی تعداد بڑھ کر 69 ہو گئی ہے، جبکہ 150 سے زائد افراد زخمی ہوئے ہیں۔ حکام کے مطابق متاثرہ علاقوں میں بجلی اور پانی کی فراہمی بحال کرنے اور ملبے تلے دبے افراد کو نکالنے کے لیے ریسکیو آپریشن جاری ہے۔

زلزلے کا مرکز صوبہ سیبو کے ساحل کے قریب تھا جہاں رات 10 بجے سے کچھ پہلے شدید جھٹکے محسوس کیے گئے۔ سیبو کی آبادی 34 لاکھ ہے اور یہ فلپائن کا مشہور سیاحتی مقام ہے۔ حکام نے بتایا کہ بوگو شہر کا اسپتال مریضوں سے بھر گیا ہے جبکہ سان ریمیجیو قصبے کو آفت زدہ قرار دے دیا گیا ہے تاکہ امدادی کارروائیوں میں تیزی لائی جا سکے۔

سیبو کے نائب میئر نے متاثرین کے لیے کھانے پینے کی اشیا، پانی اور ریسکیو مشینری کی فوری فراہمی کی اپیل کی ہے۔ ان کا کہنا ہے کہ بارش اور بجلی کی بندش نے مشکلات مزید بڑھا دی ہیں۔

مقامی میڈیا نے ویڈیوز جاری کی ہیں جن میں لوگ گھروں سے باہر بھاگتے دکھائی دیتے ہیں جبکہ عمارتیں اور ایک سو سال پرانی چرچ زمین بوس ہو گئی۔ بعض ہلاکتیں اس وقت ہوئیں جب سان ریمیجیو کے ایک اسپورٹس کمپلیکس میں کھیل کے دوران چھت گر گئی۔

زلزلے کے بعد کئی جھٹکے ریکارڈ کیے گئے جن میں سب سے شدید 6 شدت کا تھا، تاہم سونامی کا کوئی خطرہ نہیں پایا گیا۔ صدر فرڈینینڈ مارکوس جونیئر نے متاثرین سے اظہار تعزیت کرتے ہوئے یقین دلایا کہ حکومت تیز ترین امداد فراہم کرے گی۔

فلپائن پیسفک رنگ آف فائر پر واقع ہے جہاں زلزلے اور آتش فشاں عام ہیں۔