اٹلی نے غزہ امدادی فلوٹیلا کی فوجی نگرانی ختم کرنے کا اعلان کر دیا

اٹلی نے منگل کے روز اعلان کیا ہے کہ وہ غزہ کے لیے امداد لے جانے والے بین الاقوامی قافلے کی فوجی نگرانی ختم کر دے گا، جس کے بعد یہ قافلہ اسرائیلی کارروائی کے خطرے سے دوچار ہو گیا ہے۔

یہ قافلہ، جسے گلوبل صمود فلوٹیلا کا نام دیا گیا ہے، 40 سے زائد سول کشتیوں پر مشتمل ہے جن میں 500 سے زیادہ افراد سوار ہیں، جن میں پارلیمانی ارکان، وکلا اور ماحولیاتی کارکن گریٹا تھنبرگ بھی شامل ہیں۔ اس قافلے کا مقصد اسرائیل کی جانب سے غزہ پر عائد ناکہ بندی توڑنا ہے۔

اٹلی کی وزارتِ دفاع کے مطابق، جیسے ہی قافلہ غزہ کے ساحل سے 150 ناٹیکل میل (278 کلومیٹر) کے فاصلے پر پہنچے گا، اطالوی جنگی جہاز اس کی نگرانی ختم کر دے گا۔ وزارت نے کہا کہ یہ پیش رفت بدھ کی نصف شب کے قریب متوقع ہے۔

اٹلی نے فلوٹیلا سے اپیل کی ہے کہ وہ سمجھوتہ کرتے ہوئے اپنی امدادی اشیا قبرص کی بندرگاہ پر اتار دیں تاکہ اسرائیل کے ساتھ کسی تصادم سے بچا جا سکے، تاہم قافلے کے منتظمین نے اس تجویز کو بار بار مسترد کر دیا ہے۔ ان کا کہنا ہے: فلوٹیلا آگے بڑھے گی، اطالوی بحریہ اس مشن کو نہیں روک سکتی۔ انسانی تقاضہ ہے کہ غزہ کی ناکہ بندی توڑی جائے۔

گزشتہ ہفتے فلوٹیلا پر یونان کے قریب بین الاقوامی پانیوں میں ڈرون حملے ہوئے، جن میں اسٹن گرینیڈ اور آنسو گیس استعمال کی گئی۔ کارکنوں کا الزام ہے کہ اسرائیل اس حملے کے پیچھے تھا، تاہم تل ابیب نے ردِعمل دینے سے گریز کیا۔

فلوٹیلا کی ترجمان ماریہ ایلینا ڈیلیا نے کہا کہ کارکن ممکنہ اسرائیلی کارروائی کے لیے تیار ہیں۔ ادھر اٹلی کے وزیر دفاع نے خدشہ ظاہر کیا کہ قافلے کو کھلے سمندر میں روک کر کارکنوں کو گرفتار کر لیا جائے گا۔

اطالوی وزیرِاعظم جارجیا میلونی نے قافلے کو رکنے پر زور دیا، جبکہ پوپ لیو نے کارکنوں کی سلامتی کے حوالے سے تشویش ظاہر کرتے ہوئے کہا کہ سب یہی دعا کر رہے ہیں کہ کوئی تشدد نہ ہو اور انسانی جانوں کا احترام کیا جائے۔

غزہ پر اسرائیلی حملوں میں اب تک 66,000 سے زائد فلسطینی شہید ہو چکے ہیں۔