نامناسب اشارے، پاکسپتان کا ارشدیپ سنگھ کیخلاف کارروائی کا مطالبہ

پاکستان کرکٹ بورڈ (پی سی بی) نے بھارتی فاسٹ بولر ارشدیپ سنگھ کے خلاف انٹرنیشنل کرکٹ کونسل (آئی سی سی) میں شکایت درج کرادی۔

آج نیوز کے مطابق پی سی بی نے ارشدیپ سنگھ پر 21 ستمبر کو میچ کے اختتام پر تماشائیوں کی جانب انتہائی نامناسب اور قابل اعتراض اشارے کرنے کا الزام عائد کیا ہے۔

شکایت میں مؤقف اختیار کیا گیا ہے کہ ارشدیپ کا رویہ نہ صرف آئی سی سی کے ضابطہ اخلاق کی خلاف ورزی ہے بلکہ اس سے کھیل کی ساکھ بھی متاثر ہوئی ہے۔

ذرائع کے مطابق پی سی بی حکام نے ارشدیپ کے خلاف تادیبی کارروائی کا مطالبہ کیا ہے اور آئی سی سی سے ضابطہ اخلاق کے تحت سخت نوٹس لینے کی اپیل کی ہے۔

یہ امر قابل ذکر ہے کہ اس سے قبل بھی پی سی بی کی شکایت پر آئی سی سی نے بھارتی کپتان سوریہ کمار یادو پر ایشیا کپ کے دوران ضابطہ اخلاق کی خلاف ورزی پر کارروائی کی تھی۔

پاکستان کے خلاف گروپ میچ کے بعد پوسٹ میچ پریزینٹیشن میں سیاسی حوالہ دینے پر بھارتی کپتان پر میچ فیس کا 30 فیصد جرمانہ عائد کیا گیا تھا۔

واضح رہے کہ پاکستانی فاسٹ بولر حارث رؤف کو بھی ماضی میں تماشائیوں کی طرف سیاسی اشارے کرنے پر سزا کا سامنا کرنا پڑا تھا۔