صدر ٹرمپ کی امریکی کمپنیوں کو پاکستان میں فوری سرمایہ کاری کی ہدایت

وزیراعظم شہباز شریف نے کہا ہے کہ امریکی صدر ڈونلڈ ٹرمپ نے امریکی کمپنیوں کو ہدایت کی ہے کہ وہ فوری طور پر پاکستان میں سرمایہ کاری کے مواقع تلاش کریں۔

یہ بات انہوں نے نیو یارک میں میڈیا سے گفتگو کرتے ہوئے امریکی صدر کے ساتھ حالیہ ملاقات کے حوالے سے کہی۔

وزیراعظم نے بتایا کہ صدر ٹرمپ کے ساتھ ملاقات خوشگوار ماحول میں ہوئی اور صدر نے پاکستان کے ساتھ تجارتی تعلقات، مشترکہ منصوبوں اور سرمایہ کاری کے حوالے سے حوصلہ افزا باتیں کیں۔ انہوں نے امریکی کمپنیوں کو فوری طور پر پاکستان جانے اور سرمایہ کاری کے مواقع پر بات چیت کرنے کی ہدایت دی۔

وزیراعظم نے کہا کہ اس دوران کئی مشترکہ منصوبوں پر امریکی کمپنیوں کے ساتھ معاہدے بھی ہوئے۔

انہوں نے ایک بار پھر صدر ٹرمپ کا شکریہ ادا کرتے ہوئے کہا کہ انہوں نے اپنی ٹیم کے ساتھ مل کر خطے میں پاکستان اور بھارت کے درمیان ممکنہ جنگ کو روکنے میں اہم کردار ادا کیا، جسے پاکستانی قوم نے انتہائی قدر کی نگاہ سے دیکھا۔

انہوں نے کہا کہ میں نے پاکستان کے 24 کروڑ عوام اورحکومت کی جانب سے ان کا شکریہ ادا کیا کہ انہوں نے جنگ بندی کو یقینی بنانے کے لیے حکمت اور پیش قدمی کا مظاہرہ کیا۔

شہباز شریف نے مزید کہا کہ اگر یہ تنازع بڑھتا تو اس کے نتائج تباہ کن ہوسکتے تھے۔

واضح رہے کہ وزیرِاعظم جمعرات کو آرمی چیف فیلڈ مارشل عاصم منیر کے ہمراہ صدر ٹرمپ سے ملاقات بھی کرچکے ہیں۔

وزیراعظم آفس کے بیان کے مطابق، شہباز شریف نے امریکی سرمایہ کاری کے لیے زراعت، ٹیکنالوجی، کان کنی اور توانائی کے شعبے مختص کیے ہیں، جبکہ صدر ٹرمپ نے پہلے بھی امریکی کمپنیوں سے کہا تھا کہ وہ پاکستان میں تیل کی تلاش کریں۔

وزیرِاعظم نے اعتماد کا اظہار کیا کہ صدر ٹرمپ کی قیادت میں پاکستان-امریکہ شراکت داری مزید مضبوط ہوگی، جو دونوں ممالک کے باہمی فائدے کے لیے ہو گی۔ ملاقات کے فوری بعد وائٹ ہاؤس کی جانب سے کوئی بیان جاری نہیں ہوا، تاہم ملاقات سے کچھ دیر قبل ٹرمپ نے اوول آفس میں صحافیوں سے کہا کہ عاصم منیر اور وزیراعظم شہباز شریف دونوں بہت عظیم شخصیات ہیں۔