آٹو کمپنی سازگار کی فلپائن، میکسیکو اور افغانستان میں نئی برآمدی منڈیوں پر نظر

سازگار انجینئرنگ ورکس لمیٹڈ (ایس اے زید ای ڈبلیو) جو کہ ایک پاکستانی آٹوموبائل ساز کمپنی ہے، نے اعلان کیا ہے کہ وہ ترقی کو مزید مضبوط کرنے اور آمدنی کے ذرائع کو متنوع بنانے کی حکمتِ عملی کے تحت اپنی برآمدات کو نئی منڈیوں تک وسعت دے گی، جن میں فلپائن، میکسیکو اور افغانستان شامل ہیں۔

یہ اطلاع جمعرات کو ٹاپ لائن سیکیورٹیز کی جانب سے منعقدہ ایک اینالسٹ بریفنگ میں فراہم کی گئی۔

بروکریج ہاؤس کے مطابق، سازگار کی مینجمنٹ نے بتایا کہ حالیہ سیلاب کے باوجود کمپنی کی ڈلیوریز بڑی حد تک متاثر نہیں ہوئیں، سوائے اس عارضی رکاوٹ کے جب کراچی۔لاہور شاہراہ بند رہی۔

پاکستان میں حالیہ سیلاب نے سپلائی چین کو شدید متاثر کیا ہے، جس کے نتیجے میں انفراسٹرکچر خصوصاً سڑکوں کو نقصان پہنچنے کے باعث ٹرانسپورٹیشن میں تاخیر ہوئی۔

دریں اثنا، سازگار، جو اس وقت چھ ویریئنٹس (چار ہیول اور دو جولیون ماڈلز) پیش کرتی ہے، نے بتایا کہ زبردست ڈیمانڈ کے باعث ڈلیوری کا وقت دو سے تین ماہ سے بڑھ کر چار ماہ تک جا پہنچا ہے۔

کمپنی نے آگاہ کیا کہ اس کی فور-وہیلر پروڈکشن کپیسٹی یومیہ 40 گاڑیوں کی ہے، تاہم موجودہ پیداوار 60 روزانہ تک پہنچ گئی ہے، جس نے مینجمنٹ کو توسیعی منصوبے پر غور کرنے پر مجبور کیا ہے۔

ٹاپ لائن کے مطابق بکنگز اس سطح سے زیادہ ہونے کے باعث کمپنی کے توسیعی منصوبے پیداواری صلاحیت کو بڑھا کر 100 سے 120 گاڑیاں یومیہ تک لے جائیں گے، جبکہ اگر طلب میں اضافہ جاری رہا تو ڈبل شفٹ پر بھی غور کیا جائے گا۔

مینجمنٹ نے مزید بتایا کہ نئی ماڈلز متعارف کروائے جا رہے ہیں، جن میں ٹینک اور کینن الفا شامل ہیں، جو مارچ 2026 میں لانچ کیے جائیں گے۔

مالی طور پر کمپنی نے بتایا کہ اس کا ٹرن اوور 89 فیصد اضافے کے ساتھ 109 ارب روپے تک پہنچ گیا ہے، جبکہ منافع بعد از ٹیکس (پی اے ٹی) 106 فیصد بڑھ کر 16 ارب روپے ہوگیا ہے، جس کی بنیادی وجہ ہیول کی سیلز ہیں۔