اقوامِ متحدہ میں پاکستان اور عرب ممالک کی ٹرمپ کی قیادت میں غزہ میں امن و تعمیر نو کی کوششوں کی حمایت

امریکی صدر ڈونلڈ ٹرمپ نے اقوامِ متحدہ کی 80 ویں جنرل اسمبلی کے موقع پر عرب لیگ اور اسلامی تعاون تنظیم (او آئی سی) کے رکن ممالک کے رہنماؤں سے ملاقات کی ہے، جہاں ایک مشترکہ اعلامیے کے مطابق غزہ میں فوری جنگ بندی اور انسانی امداد تک بہتر رسائی پر زور دیا گیا ہے۔

یہ کثیرالملکی اجلاس منگل کے روز صدر ٹرمپ کی کوششوں سے منعقد ہوا، جس کی میزبانی انہوں نے قطر کے امیر شیخ تمیم بن حمد آل ثانی کے ساتھ مشترکہ طور پر کی۔

شرکاء میں وزیرِاعظم شہباز شریف، اردن کے فرماں روا شاہ عبداللہ دوم، ترکی کے صدر رجب طیب اردوان، انڈونیشیا کے صدر پرابووو سوبیانتو، مصر کے وزیرِاعظم مصطفیٰ کمال مدبولی، متحدہ عرب امارات کے نائب وزیرِاعظم شیخ عبداللہ بن زاید النہیان اور سعودی عرب کے وزیرِ خارجہ شہزادہ فیصل بن فرحان آل سعود شامل تھے۔

ان رہنماؤں نے غزہ میں بگڑتی ہوئی انسانی صورتحال پر شدید تشویش کا اظہار کرتے ہوئے فلسطینیوں کی جبری بے دخلی کو مسترد کیا اور پائیدار امن کی جانب پہلا قدم اٹھانے کے لیے یرغمالیوں کی رہائی اور بھرپور امداد کی فوری رسائی کا مطالبہ کیا۔

انہوں نے بیت المقدس کے مقدس مقامات کے تحفظ اور مغربی کنارے میں استحکام برقرار رکھنے کی اہمیت پر بھی زور دیا ہے۔

اجلاس میں فلسطینی اتھارٹی کی اصلاحاتی کوششوں کی حمایت کی گئی، جب کہ عرب لیگ اور او آئی سی کی تجاویز کی بنیاد پر غزہ کی تعمیرِ نو کے منصوبے کی توثیق کی گئی، جس کے لیے بین الاقوامی سطح پر امداد فراہم کرنے اور فلسطینی قیادت کو مضبوط بنانے پر زور دیا گیا ہے۔

شرکاء نے خطے میں امن عمل کو آگے بڑھانے میں صدر ٹرمپ کے کردار کو سراہا اور کہا کہ یہ اجلاس علاقائی استحکام اور تعاون کی جانب ایک مستقل اور نتیجہ خیز عمل کا نقطۂ آغاز ہونا چاہیے۔

دفترِ خارجہ کے مطابق اجلاس میں پاکستان، اردن، ترکی، مصر اور انڈونیشیا کے وزرائے خارجہ اور نائب وزرائے اعظم نے بھی شرکت کی۔ صدر ٹرمپ کے ہمراہ امریکی وزیر خارجہ مارکو روبیو اور مشرقِ وسطیٰ کے لیے خصوصی ایلچی اسٹیو وٹکوف بھی موجود تھے۔