روئی کی آمد میں 40 فیصد اضافہ، مگر سیلاب و بارشوں سے خدشات برقرار

کاٹن مارکیٹ میں مندی کا رجحان برقرار ہے اور اسپاٹ ریٹ میں 500 روپے فی من کمی ریکارڈ کی گئی جس نے کاشتکاروں اور ٹیکسٹائل صنعت کو تشویش میں مبتلا کردیا ہے۔

آل پاکستان ٹیکسٹائل ملز ایسوسی ایشن (اپٹما) کے چیئرمین میاں کامران ارشد کے مطابق مقامی پیداوار میں کمی کے باعث پاکستان کو 7 سے 8 ملین گانٹھیں درآمد کرنا ہوں گی، جس سے زرمبادلہ کے ذخائر پر بھاری دباؤ پڑے گا۔

پاکستان کاٹن جنرز ایسوسی ایشن (پی سی جی اے) کی تازہ رپورٹ میں بتایا گیا ہے کہ 15 ستمبر 2025 تک روئی کی آمد 20 لاکھ 4 ہزار 384 گانٹھوں تک پہنچ گئی، جو گزشتہ سال کے مقابلے میں 40 فیصد زیادہ ہے۔ سندھ میں پیداوار 47 فیصد، پنجاب میں 28 فیصد اور بلوچستان میں بھی مثبت رجحان ریکارڈ کیا گیا۔ تاہم حالیہ بارشوں اور سیلاب کے باعث ماہرین نے 6 سے 10 لاکھ گانٹھوں تک کمی کا خدشہ ظاہر کیا ہے۔

کئی اضلاع خصوصاً جنوبی پنجاب میں شدید نقصان رپورٹ ہوا ہے جہاں بہاولنگر اور جلالپور پیر والا سمیت مختلف علاقوں میں 40 فیصد تک فصل تباہ ہوگئی۔ اس صورتحال نے نہ صرف کسانوں بلکہ جننگ فیکٹریوں اور ٹیکسٹائل سیکٹر کو بھی متاثر کیا ہے۔

پاکستان بزنس فورم نے حکومت سے سفارش کی ہے کہ روئی پر 18 فیصد سیلز ٹیکس دو سال کے لیے مؤخر کیا جائے تاکہ کاشتکاروں کو ریلیف مل سکے۔

ماہرین کا کہنا ہے کہ اگرچہ فصل کی آمد میں اضافہ ہوا ہے لیکن موسمیاتی آفات، کاٹن لیف کرل وائرس اور پالیسی مسائل نے شعبے کو غیر یقینی میں ڈال دیا ہے۔ مقامی پیداوار 5 ملین گانٹھوں تک گرنے کا اندیشہ ہے جس سے ملک کو 6 ملین گانٹھیں درآمد کرنا پڑیں گی، نتیجتاً تجارتی خسارہ مزید بڑھے گا۔