پنجاب حکومت اور ہانگ کانگ ٹریڈ ڈویلپمنٹ کونسل کے درمیان تعاون کا معاہدہ

پنجاب کے محکمہ صنعت و تجارت اور ہانگ کانگ ٹریڈ ڈویلپمنٹ کونسل کے درمیان پنجاب میں سرمایہ کاری کو فروغ دینے کے لیے ایک تعاون کے معاہدے پر دستخط کیے گئے۔

صوبائی وزیر صنعت و تجارت چوہدری شافع حسین اور ہانگ کانگ کے کنٹری ہیڈ وہاب طارق بٹ نے ہفتہ کے روز پی ایس آئی سی ہاؤس میں معاہدے پر دستخط کیے۔

معاہدے کے تحت دونوں فریق پنجاب میں سرمایہ کاری کے فروغ میں سہولت فراہم کریں گے، تجارتی وفود کے تبادلے کریں گے، بزنس سیمینارز منعقد کریں گے اور ہانگ کانگ، چین اور دیگر خطوں کے سرمایہ کاروں کے درمیان تعلقات کو مزید مضبوط بنائیں گے۔ وہاب طارق بٹ کو خطے میں سرمایہ کاری کے روابط بڑھانے کے لیے کوآرڈینیٹر مقرر کیا گیا ہے۔

اس موقع پر صوبائی وزیر چوہدری شافع حسین نے کہا کہ پنجاب میں تیز رفتار صنعتی ترقی اور نئی سرمایہ کاری کو راغب کرنا ان کا مشن ہے۔ پنجاب سرمایہ کاری کے لیے نہایت موزوں ماحول فراہم کرتا ہے، جس نے اسے ملکی و غیر ملکی سرمایہ کاروں کی پہلی ترجیح بنا دیا ہے۔

انہوں نے کہا کہ کئی بین الاقوامی کمپنیاں تیزی سے پنجاب میں صنعتی یونٹس قائم کر رہی ہیں۔ غیر ملکی سرمایہ کاری نہ صرف روزگار کے مواقع پیدا کر رہی ہے بلکہ صوبے میں جدید ٹیکنالوجیز کی منتقلی کا باعث بھی بن رہی ہے۔