وزیرِاعظم شہباز شریف بدھ کو ولی عہد محمد بن سلمان کی دعوت پر سعودی عرب کا دورہ کریں گے۔
وزارتِ خارجہ کے مطابق وزیراعظم ولی عہد کے ساتھ دوطرفہ ملاقات کریں گے جس میں پاکستان اور سعودی عرب کے تعلقات کے تمام پہلوؤں کا جائزہ لیا جائے گا۔
ترجمان کے مطابق دونوں رہنماؤں کے درمیان علاقائی اور عالمی امور پر بھی باہمی دلچسپی کے معاملات پر تبادلۂ خیال متوقع ہے۔
وزارتِ خارجہ نے مزید کہا کہ اس دورے کے دوران مختلف شعبوں میں تعاون کو باضابطہ شکل دیے جانے کی توقع ہے، جو دونوں ممالک کے دیرینہ برادرانہ تعلقات کو مزید مضبوط اور گہرا کرنے کے مشترکہ عزم کی عکاسی کرے گا۔
وزیراعظم کا یہ دورہ دونوں رہنماؤں کو اس منفرد شراکت داری کو مزید مستحکم کرنے اور تعاون کے نئے مواقع تلاش کرنے کا ایک اہم موقع فراہم کرے گا، جس سے دونوں ممالک کے عوام کو فائدہ پہنچے گا۔
یاد رہے کہ 15 ستمبر کو وزیراعظم نے دوحہ میں عرب۔اسلامی سربراہی اجلاس کے موقع پر سعودی ولی عہد سے ملاقات کی۔
وزیراعظم نے پاکستان اور سعودی عرب کے تاریخی تعلقات کو دہراتے ہوئے مملکت کا پاکستان کے ساتھ مستقل تعاون پر شکریہ ادا کیا۔
سعودی ولی عہد نے پاکستان کی اقوام متحدہ کی سلامتی کونسل اور او آئی سی میں قطر کے ساتھ یکجہتی کے لیے کی جانے والی فعال سفارتی کوششوں کو سراہا۔
انہوں نے کہا کہ وہ وزیراعظم کے آئندہ سرکاری دورۂ سعودی عرب کے منتظر ہیں۔
Comments
Comments are closed.