بھارت کی اسپائس جیٹ کا 8 بوئنگ 737 طیارے حاصل کرنے کا اعلان

بھارت کی مشکلات کا شکار بجٹ ایئرلائن اسپائس جیٹ نے منگل کے روز اعلان کیا ہے کہ وہ اپنی فلیٹ کو مضبوط بنانے کے لیے آٹھ مزید بوئنگ 737 طیارے لیز پر حاصل کرے گی تاکہ آنے والے تہواروں اور سردیوں کے سیزن کے دوران مانگ کو پورا کیا جا سکے۔

اس تازہ معاہدے کے بعد ایئرلائن کے فلیٹ میں شامل کیے جانے والے طیاروں کی مجموعی تعداد 18 ہو جائے گی، جن میں اکتوبر سے ترسیل کے لیے طے شدہ 10 بوئنگ جیٹ طیارے بھی شامل ہیں جن کے لیے پہلے ہی معاہدے ہو چکے ہیں۔

اسپائس جٹ نے حالیہ برسوں میں لیزنگ کمپنیوں اور دیگر قرض خواہوں کے ساتھ تنازعات حل کرنے کے لیے متعدد سمجھوتے کیے ہیں، لیکن پھر بھی گنجائش میں توسیع کے مسائل کا شکار رہی ہے۔

گزشتہ ہفتے ایئرلائن نے کریڈٹ سوئس کو 24 ملین ڈالر کی ادائیگی کی اور کارلائل کی کمرشل ایوی ایشن انویسٹمنٹ اور سروسنگ یونٹ سے 89.5 ملین ڈالر کا تصفیہ حاصل کیا۔

جون میں ایئرلائن کو مسلسل دوسرے سہ ماہی میں نقصان کا سامنا کرنا پڑا، جس کی بڑی وجہ بعض روٹس پر تفریحی سفر کی کمزور طلب تھی، خاص طور پر ان دنوں جب بھارت اور پاکستان کے درمیان دہائیوں میں بدترین جھڑپیں ہوئیں۔

ایئرلائن نے یہ بھی نشاندہی کی کہ اس کے گراؤنڈ کیے گئے طیاروں کو دوبارہ سروس میں لانے میں تاخیر نے اس کے مسائل میں اضافہ کیا ہے۔