ایف آئی اے کا ہنڈی حوالہ اور انسانی اسمگلنگ کے نیٹ ورکس کے خلاف کریک ڈاؤن

وفاقی تحقیقاتی ایجنسی (ایف آئی اے) نے ملک کے مختلف حصوں میں غیر قانونی کرنسی ایکسچینج نیٹ ورکس اور انسانی اسمگلنگ میں ملوث گروہوں کے خلاف کریک ڈاؤن تیز کر دیا ہے، جس کے نتیجے میں متعدد گرفتاریاں عمل میں آئیں اور کروڑوں روپے کی رقم برآمد کی گئی ہے۔

ایف آئی اے کے ترجمان کے مطابق کمرشل بینکنگ سرکل پشاور نے ہنڈی حوالہ کے نیٹ ورک کے خلاف ٹارگٹڈ آپریشن کیا۔

کارروائی کے دوران محمد خالد اور محمد لطیف نامی دو ملزمان کو پشاور سے گرفتار کیا گیا۔

ایف آئی اے کے مطابق ملزمان غیر قانونی رقوم کی منتقلی میں ملوث پائے گئے اور ان کے قبضے سے 216 ملین روپے سے زائد کی رقم برآمد کی گئی۔ اس کے علاوہ حوالہ ٹرانزیکشنز سے متعلق شواہد بھی قبضے میں لیے گئے۔

ترجمان نے مزید کہا کہ گرفتار افراد کرنسی ڈیلنگ کے لیے کوئی درست لائسنس پیش کرنے میں ناکام رہے اور نہ ہی برآمد شدہ رقم کے حوالے سے تسلی بخش جواب دے سکے۔ اس سلسلے میں باضابطہ تفتیش شروع کر دی گئی ہے۔

ایک علیحدہ کارروائی میں ایف آئی اے بلوچستان زون نے گوادر کے جیوانی علاقے میں سمندر کے راستے ایران جانے کی کوشش ناکام بناتے ہوئے 60 افراد کو گرفتار کر لیا۔ گرفتار ہونے والوں میں 19 کا تعلق ملاکنڈ، 16 کا بنوں، 9 کا تعلق گوجرانوالہ اور9 کا لوئر دیر، 3 کا اپر دیر اور 2 کا مردان سے تھا۔

ایف آئی اے نے تصدیق کی کہ ملزمان کے خلاف چار الگ الگ مقدمات درج کر لیے گئے ہیں اور مزید تحقیقات جاری ہیں۔