او ایم پیز اور کورئیرز غیر رجسٹرڈ سیلرز کو خدمات نہ دیں، ایف بی آر

فیڈرل بورڈ آف ریونیو (ایف بی آر) نے یکم جولائی 2025 سے نافذ ہونے والے نئے ای-کامرس ٹیکس نظام کے تحت آن لائن مارکیٹ پلیسز (او ایم پیز) اور کورئیر سروسز کو ہدایت دی ہے کہ وہ کسی بھی غیر رجسٹرڈ فروخت کنندہ کو اپنی خدمات فراہم نہ کریں۔

حالیہ انکم ٹیکس سرکلر میں ایف بی آر نے وضاحت کی ہے کہ ہر فروخت کنندہ کے لیے قانون کے تحت انکم ٹیکس میں رجسٹریشن لازمی ہے اور آن لائن مارکیٹ پلیسز (او ایم پیز) اور کورئیر سروسز اب کسی بھی غیر رجسٹرڈ فروخت کنندہ کو اپنی خدمات فراہم نہیں کر سکتیں۔ او ایم پیز کو اپنی پلیٹ فارمز پر کام کرنے والے وینڈرز کے بارے میں اسٹیٹمنٹس جمع کروانے کی پابندی ہے۔

ایف بی آر کے مطابق، پاکستان میں ریٹیل مارکیٹ کے بدلتے ہوئے رجحانات اور اس حقیقت کو مدنظر رکھتے ہوئے کہ بڑی تعداد میں فروخت کنندگان جو آن لائن مارکیٹ پلیسز یا اپنی ای-اسٹورز کے ذریعے کام کر رہے ہیں غیر رجسٹرڈ اور غیر رسمی طور پر کام کرتے ہیں، ایک فریم ورک تیار کیا گیا ہے تاکہ ان فروخت کنندگان کو رجسٹر کیا جاسکے، انہیں آسان طریقہ کار کے تحت نیشنل ٹیکس نمبر (این ٹی این) فراہم کیا جا سکے اور ہر ڈیجیٹل آرڈر شدہ لین دین پر ٹیکس کی شمولیت کو یقینی بنایا جا سکے جس کے لیے ایک قابل عمل ودہولڈنگ ٹیکس نظام قائم کیا گیا ہے۔

ملکی ای-کامرس لین دین پر ٹیکس عائد کرنے کے لیے سیکشن 6 اے متعارف کرایا گیا ہے جس کے تحت ہر وہ ادائیگی جو آن لائن مارکیٹ پلیس (او ایم پی) یا ویب سائٹ کے ذریعے ڈیجیٹل آرڈر کردہ اشیاء یا خدمات کے لیے وصول کی جائے، اس پر ٹیکس عائد ہوگا۔

فوری ودہولڈنگ ٹیکس کے نفاذ کو یقینی بنانے کے لیے سیکشن 153(2A) میں متعلقہ ترامیم کی گئی ہیں جس کے تحت ادائیگی کے درمیانی ادارے (بینکنگ کمپنی، مالیاتی ادارہ، لائسنس یافتہ فارن ایکسچینج ڈیلر اور پیمنٹ گیٹ ویز) اور کیش آن ڈلیوری (سی او ڈی ) میں شامل کورئیر کو ذمہ دار بنایا گیا ہے کہ وہ ادائیگی وصول کرتے وقت ایک فیصد ودہولڈنگ ٹیکس اور مجموعی وصولی کی رقم پر دو فیصد ٹیکس جمع کریں۔

ایف بی آر نے وضاحت کی ہے کہ ودہولڈنگ کی شرح میں فرق اس لیے رکھا گیا ہے تاکہ ادائیگی کے لیے ڈیجیٹل ذرائع کے استعمال کی حوصلہ افزائی کی جاسکے اور مجموعی قومی مقصد یعنی کیش لیس معیشت کی طرف منتقلی حاصل ہو۔

اس اسکیم کے تحت جمع شدہ ٹیکس سیکشن 6 اے کے تحت حتمی ٹیکس ہوگا جو فروخت کنندہ کی ملکی ای-کامرس اور برآمدی لین دین سے حاصل ہونے والی آمدنی پر عائد ہوگا۔

تاہم سیکشن 154 اور 154 اے کے تحت ودہولڈنگ اس رجیم کے دائرہ کار میں شامل نہیں ہوگی۔ وضاحت کے لیے اس اسکیم سے متعلق اصطلاحات جیسے ای-کامرس، ڈیجیٹل خدمات، آن لائن مارکیٹ پلیس، ادائیگی کا درمیانی ادارہ اور کورئیر سروس کو انکم ٹیکس آرڈیننس میں شامل کیا گیا ہے۔

ایف بی آر نے مزید کہا کہ ادائیگی کے درمیانی ادارے اور کورئیر کو ہر فروخت کنندہ کے نام پر ٹیکس جمع کرنا ہوگا، اسے ماہانہ بنیاد پر خزانے میں جمع کروانا ہوگا اور اس حوالے سے مقررہ ودہولڈنگ اسٹیٹمنٹ بھی جمع کروانا ہوگی۔ ادائیگی کے درمیانی ادارے اور کورئیر سروس سے یہ بھی تقاضا کیا گیا ہے کہ وہ ہر فروخت کنندہ کے تمام لین دین کی معلومات کے ساتھ مقررہ ودہولڈنگ اسٹیٹمنٹ پیش کریں، جو او ایم پی یا ای-اسٹور کے ذریعے فروخت کررہا ہو۔

ایف بی آر نے خبردار کیا ہے کہ اگر مقررہ اسٹیٹمنٹس جمع کروانے میں تعمیل نہ کی گئی تو جرمانے عائد کیے جائیں گے۔ آن لائن مارکیٹ پلیس اور کورئیر سروس پر بھی ٹیکس ودہولڈ کرنے یا فروخت کنندہ کی رجسٹریشن کی تعمیل نہ کرنے کی صورت میں جرمانے لاگو ہوں گے۔

ٹیکس جمع کرنے کی ذمہ داری کے حوالے سے وضاحت کی گئی ہے کہ اگر فروخت کنندہ ای-اسٹورز یا اسی طرح کی موبائل ایپلیکیشنز ہیں جہاں ادائیگی آن لائن کی جاتی ہے، تو اس صورت میں وصول کنندہ بینک بطور ادائیگی درمیانی ادارہ ذمہ دار ہوگا اور ٹیکس جمع کرنے کا پابند ہوگا۔

دوسری جانب، اگر فروخت کنندہ ای-اسٹورز یا موبائل ایپلیکیشنز ہیں جہاں ادائیگی کیش آن ڈیلیوری (سی او ڈی) کے ذریعے کی جاتی ہے، تو کورئیر، جو ای-اسٹور یا موبائل ایپلیکیشن کو سامان پہنچانے اور خریدار کے دروازے پر نقد رقم وصول کرنے کی سہولت فراہم کرتا ہے، تمام قانونی ذمہ داریوں کی تعمیل کرے گا۔

کاپی رائٹ بزنس ریکارڈر 2025