چینی صدر کی تیانجن میں مودی سے ملاقات

چینی صدر شی جن پنگ اور بھارتی وزیراعظم نریندر مودی نے اتوار کو شمالی چین کے ساحلی شہر تیانجن میں دو طرفہ ملاقات کی۔ یہ ملاقات شنگھائی تعاون تنظیم (ایس سی او) کے دو روزہ اجلاس کے موقع پر ہوئی جہاں روسی صدر ولادیمیر پیوٹن سمیت وسطی ایشیا، جنوبی ایشیا، مشرق وسطیٰ اور جنوب مشرقی ایشیا کے رہنما بھی شریک ہیں، جو گلوبل ساؤتھ کے اتحاد کا مظاہرہ ہے۔

یہ ملاقات ایسے وقت میں ہوئی ہے جب واشنگٹن نے بھارت کی روسی تیل کی خریداری پر بھارتی مصنوعات پر 50 فیصد ٹیرف عائد کیا ہے۔ تجزیہ کاروں کے مطابق مودی اور شی جن پنگ مغرب کے دباؤ کے مقابلے میں متحدہ محاذ دکھانے کے خواہاں ہیں۔ دونوں ممالک گزشتہ برس اکتوبر میں سرحدی تنازع پر معاہدے کے بعد تعلقات کو بحال کرنے کی کوشش کر رہے ہیں۔ حالیہ ہفتوں میں تعلقات میں مزید بہتری آئی ہے کیونکہ بھارت امریکی ٹیرف کے دباؤ سے نکلنے کے لیے چین کے قریب جانے اور روس سے تعلقات قائم رکھنے کا خواہاں ہے۔

چینی وزیر خارجہ وانگ ای کے حالیہ دورہ بھارت میں براہِ راست پروازوں کی بحالی اور نایاب معدنیات، کھاد اور مشینری پر پابندیاں ہٹانے پر اتفاق ہوا۔ بیجنگ نے عندیہ دیا ہے کہ وہ بھارت کے ساتھ امریکی ٹیرف کے خلاف کھڑا ہوگا۔ مبصرین کے مطابق مودی اور شی کی ملاقات میں تجارت، سرمایہ کاری، فضائی روابط اور سرحدی مسائل اہم ایجنڈا ہوں گے۔