سیلابی نقصانات مالی دباؤ اور غذائی بحران کا سبب بن سکتے ہیں، وزارت خزانہ

وزارتِ خزانہ نے جمعرات کو خبردار کیا ہے کہ پاکستان کی معیشت کو سیلابی نقصانات سے خطرات لاحق ہیں جو مالی دباؤ میں اضافے اور متاثرہ علاقوں میں خوراک کی فراہمی میں رکاوٹ کا باعث بن سکتے ہیں۔

وزارت خزانہ نے اپنی تازہ ترین ماہانہ اقتصادی رپورٹ میں کہا ہے کہ پاکستان کی معیشت مالی سال 2026 میں مستحکم میکرو اکنامک حالات اور بہتر شرح نمو کے امکانات کے ساتھ داخل ہوئی ہے، جسے بیرونی اور مالی پوزیشن میں بہتری نے سہارا دیا ہے۔

رپورٹ میں کہا گیا ہے کہ بڑی صنعتیں (ایل ایس ایم) اپریل 2025 سے بتدریج بحالی کی راہ پر ہے، جو جون میں عروج پر پہنچی، اور توقع ہے کہ آٹوموٹو اور کھاد کی پیداوار میں اضافے سے اس میں مزید تیزی آئے گی۔

وزارت خزانہ کے مطابق سرمایہ کاری کو سہولت دینے کے اقدامات، نجی شعبے پر مبنی ترقی کی حمایت کے لیے اصلاحات، مہنگائی میں کمی اور لچکدار مانیٹری پالیسی کاروباری اعتماد کو مزید مضبوط بنا سکتی ہیں۔

رپورٹ میں مزید کہا گیا کہ سازگار عالمی ماحول، تجارتی شراکت داروں سے زیادہ طلب اور امریکہ کے ساتھ پاکستان کے حالیہ تجارتی معاہدے سے برآمدات کو تقویت ملنے کی توقع ہے، جبکہ ترسیلاتِ زر ٹیرف میں نرمی کے نتیجے میں بڑھنے والی درآمدات کے باعث پیدا ہونے والے تجارتی خسارے کے دباؤ کو قابو میں رکھنے میں مدد کریں گی۔ تاہم، سیلابی نقصانات مالی دباؤ میں اضافے اور متاثرہ علاقوں میں خوراک کی فراہمی میں رکاوٹ کا باعث بن سکتے ہیں۔

پاکستان اس وقت غیر معمولی سیلابی صورتحال سے دوچار ہے جسے بھارت کی جانب سے سندھ طاس معاہدے (آئی ڈبلیو ٹی) کی معطلی اور دریاؤں کے بہاؤ میں تبدیلی، نیز بروقت سیلابی انتباہات نہ دینے نے مزید سنگین بنا دیا ہے۔

پاکستان پہلے ہی حالیہ ہفتوں میں مون سون بارشوں سے نبرد آزما ہے، جن کے باعث صرف پنجاب میں ہی 167,000 سے زائد افراد بے گھر ہو چکے ہیں، جن میں سے 40,000 افراد نے 14 اگست کے بعد جاری ہونے والی سیلابی وارننگ کے پیشِ نظر رضاکارانہ طور پر نقل مکانی کی۔

ملک بھر میں مون سون سیزن کے آغاز یعنی جون کے آخر سے بدھ تک سیلاب سے ہلاکتوں کی سرکاری تعداد 804 ہو چکی تھی، جن میں سے نصف اموات اگست میں رپورٹ ہوئیں۔

دریں اثنا، وزارتِ خزانہ نے پیش گوئی کی ہے کہ اگست 2025 میں مہنگائی کی شرح 4 تا 5 فیصد کی حد میں رہے گی۔

پاکستان بیورو آف اسٹیٹکس (پی بی ایس) کے اعداد و شمار کے مطابق جولائی 2025 میں سالانہ بنیاد پر ہیڈ لائن انفلیشن 4.1 فیصد ریکارڈ کی گئی، جو جون 2025 میں درج 3.2 فیصد کے مقابلے میں زیادہ تھی۔