چین میں ایس سی او اجلاس، پیوٹن، یو این سیکریٹری جنرل سمیت 20 سے زائد ممالک کے سربراہ شریک ہونگے

چینی صدر شی جن پنگ رواں ماہ روسی صدر ولادیمیر پیوٹن، اقوام متحدہ کے سیکریٹری جنرل انتونیو گوتریش اور 20 سے زائد ممالک کے سربراہانِ حکومت کی میزبانی کریں گے۔ بیجنگ نے جمعہ کو اعلان کیا کہ یہ سیاسی و سیکیورٹی اجلاس چین کے علاقائی اثرورسوخ کو مستحکم کرنے کے لیے منعقد کیا جا رہا ہے۔

شنگھائی تعاون تنظیم (ایس سی او) کا یہ سربراہی اجلاس تیانجن میں 31 اگست سے یکم ستمبر تک ہوگا، جس میں دنیا کے ایک چوتھائی حصے پر مشتمل رکن ممالک کے رہنما تعلقات کو مزید گہرا کرنے کے منصوبے پیش کریں گے۔ چینی معاون وزیرِ خارجہ لیو بن کے مطابق ایران کے صدر مسعود پزیشکیان، بھارتی وزیرِاعظم نریندر مودی اور ملائیشیا کے وزیرِاعظم انور ابراہیم بھی مدعو ہیں۔

اجلاس ایسے موقع پر ہو رہا ہے جب بیجنگ کئی برسوں کی سب سے بڑی فوجی پریڈ کی تیاری کر رہا ہے اور امریکی صدر ڈونلڈ ٹرمپ کی خارجہ و تجارتی پالیسیوں، خصوصاً اسرائیل، غزہ اور ٹیرف کے حوالے سے اقدامات، خطے کے کئی اہم ممالک کو چین کے قریب کر رہے ہیں۔

لیو بن نے کہا کہ عالمی حالات جتنے زیادہ پیچیدہ اور غیر یقینی ہوں، اتنی ہی زیادہ اہمیت ممالک کے درمیان اتحاد اور تعاون کو حاصل ہو جاتی ہے۔ اجلاس کے اختتام پر تیانجن اعلامیہ جاری کیا جائے گا۔ پچھلے سال آستانہ میں ہونے والے اجلاس میں علاقائی انسدادِ دہشت گردی، قابلِ تجدید توانائی اور ڈیجیٹل معیشت میں تعاون بڑھانے پر اتفاق کیا گیا تھا۔