کراچی میں آج پھر موسلا دھار بارش کا امکان

محکمہ موسمیات (پی ایم ڈی) نے جمعرات کو خبردار کیا کہ کراچی میں آج گرج چمک کے ساتھ مزید موسلا دھار بارشوں کے امکانات ہیں کیونکہ مون سون کی طاقتور ہوائیں سندھ کے بیشتر حصوں میں داخل ہو رہی ہیں۔

آج نیوز کے مطابق، منگل کی دوپہر سے اب تک شہر قائد میں بارش سے متعلقہ مختلف حادثات میں کم از کم 19 افراد جاں بحق ہو چکے ہیں۔ شدید بارشوں نے میگا سٹی کو مفلوج کر دیا، کئی علاقے 24 گھنٹے سے زائد بجلی سے محروم رہے، سڑکوں اور انفراسٹرکچر کو نقصان پہنچا اور ٹریفک جام نے شہریوں کو مشکلات سے دوچار کیا۔

مسلسل بارشوں نے کراچی میں تجارتی سرگرمیاں معطل کر دی ہیں، صرف دو دن میں تاجروں کو تقریباً 15 ارب روپے کا نقصان پہنچا ہے۔ سڑکوں پر پانی جمع، نالے اُبلنے اور گندگی کی موٹی تہہ نے دکانداروں کو کاروبار دوبارہ کھولنے سے روک دیا ہے۔

گزشتہ روز سب سے زیادہ بارش اورنگی ٹاؤن (113 ملی میٹر) میں ریکارڈ کی گئی، جبکہ پی اے ایف فیصل بیس (43 ملی میٹر)، کورنگی (35.6 ملی میٹر)، کیماڑی (31 ملی میٹر) اور جناح ٹرمینل (28.4 ملی میٹر) میں بھی نمایاں بارش ہوئی۔

محکمہ موسمیات نے خبردار کیا ہے کہ کراچی ڈویژن سمیت حیدرآباد، جامشورو، ٹھٹھہ، بدین، عمرکوٹ اور اندرون سندھ کے کئی اضلاع میں مزید بارشیں ہوں گی، جبکہ لاڑکانہ، سکھر، شہید بینظیر آباد اور دادو میں بھی موسلا دھار بارش کا امکان ہے۔

گڈو بیراج میں درمیانے درجے کا سیلاب اور سکھر بیراج میں کم درجے کا سیلاب ریکارڈ کیا گیا ہے، جبکہ محکمہ موسمیات نے خبردار کیا ہے کہ پانی کی آمد میں اضافے سے صورتحال مزید سنگین ہو سکتی ہے۔

محکمہ موسمیات نے شہریوں، کسانوں اور مویشی مالکان کو احتیاطی تدابیر اختیار کرنے کا مشورہ دیا ہے۔ آئندہ تین دنوں تک وقفے وقفے سے بارش اور گرج چمک کا سلسلہ جاری رہنے کی پیش گوئی کی گئی ہے۔

دریں اثنا، وزیراعظم شہباز شریف نے پیپلز پارٹی کے چیئرمین بلاول بھٹو زرداری سے رابطہ کرکے جاں بحق افراد پر افسوس کا اظہار کیا اور سندھ حکومت کو وفاقی حکومت کی مکمل مدد کی یقین دہانی کرائی۔