معاشی مردم شماری، پی بی ایس آج نتائج کی رپورٹ جاری کریگا

سرکاری ذرائع نے بزنس ریکارڈر کو بتایا کہ پاکستان بیورو آف اسٹیٹکس (پی بی ایس) ملک کی اقتصادی مردم شماری کی اہم نتائج رپورٹ جاری کرنے کے لیے تیار ہے۔

یہ رپورٹ حتمی شکل دے دی گئی ہے اور آج (جمعرات) ایک باقاعدہ تقریب میں وفاقی وزیر برائے منصوبہ بندی، ترقی و خصوصی اقدامات احسن اقبال اس کا اجرا کریں گے۔ اس موقع پر وفاقی و صوبائی اداروں کے نمائندے، معاشی ماہرین اور ترقیاتی شراکت دار بھی شریک ہوں گے۔

ذرائع کے مطابق پاکستان بیورو آف اسٹیٹکس نے کامیابی کے ساتھ ملک کی 7ویں آبادی و مکانات مردم شماری 2023 منعقد کی، جو کہ پاکستان کی پہلی ڈیجیٹل مردم شماری تھی۔ یہ خطے کی سب سے بڑی ڈیجیٹلائزیشن مشق قرار دی گئی جس میں 2,50,000 افراد نے حصہ لیا۔ اس مردم شماری کے دوران تقریباً 4 کروڑ عمارتوں کو جیو ٹیگ کیا گیا، 25 کروڑ افراد کو 20 ڈیموگرافک متغیرات کے تحت شمار کیا گیا اور 3 کروڑ 80 لاکھ گھرانوں کا اندراج کیا گیا۔

پہلی بار پی بی ایس نے مردم شماری کے فریم ورک میں معاشی اداروں سے متعلق سوالات شامل کیے جن میں کاروبار کی نوعیت (پاکستان انڈسٹریل اسٹینڈرڈ کلاسیفیکیشن کے مطابق) اور روزگار کے اعدادوشمار کو کور کیا گیا۔ اس جدت نے حکومت کے 7 ارب روپے بچائے اور 72 لاکھ اداروں (جن میں دکانیں، فیکٹریاں اور تعلیمی ادارے شامل ہیں) پر مشتمل ایک جامع ڈیٹا بیس فراہم کیا تاکہ شواہد پر مبنی پالیسی سازی اور معاشی منصوبہ بندی ممکن ہو سکے۔

7ویں آبادی و مکانات مردم شماری 2023 کے نتائج 5 اگست 2023 کو کونسل آف کامن انٹرسٹ (سی سی آئی) کے 50ویں اجلاس میں اتفاقِ رائے سے منظور کیے گئے اور 18 جولائی 2024 کو گاؤں کی سطح تک تفصیلی آبادی و مکانات کے نتائج ویب سائٹ اور رپورٹس کے ذریعے عوام کے سامنے پیش کیے گئے۔

اسی دوران پی بی ایس نے اقتصادی مردم شماری کے لیے جمع کردہ ڈیٹا کی کلیننگ کا عمل شروع کیا۔ اتنے بڑے پیمانے پر ڈیٹا کی کلیننگ چیلنجنگ تھی کیونکہ کاروباری سرگرمیوں کی تحریری وضاحتوں اور صنعتی کوڈز میں فرق پایا جاتا تھا۔ پی بی ایس نے اس مسئلے کو رول بیسڈ الگورتھمز، مصنوعی ذہانت (اے آءی) اور نیشنل لینگویج پروسیسنگ (این ایل پی) کے میدان میں لارج لینگویج ماڈلز (ایل ایل ایم) کے ذریعے حل کیا، جو اس بات کی عکاسی کرتا ہے کہ ادارے نے جدید ڈیٹا پروسیسنگ اور تجزیے کی صلاحیت کو مزید بڑھایا ہے۔

کاپی رائٹ بزنس ریکارڈر، 2025