امریکا کی ناظمہ الامور برائے پاکستان نٹالی اے بیکر نے کہا ہے کہ امریکا پاکستان کے توانائی شعبے میں سرمایہ کاری کے وسیع مواقع دیکھ رہا ہے اور دوطرفہ اقتصادی تعاون کو مزید فروغ دینا چاہتا ہے۔
وفاقی وزیرِ پٹرولیم علی پرویز ملک سے بدھ کو ہونے والی اعلیٰ سطح ملاقات میں توانائی شعبے، خصوصاً تیل، گیس اور معدنیات میں تعاون بڑھانے پر تبادلہ خیال کیا گیا۔
امریکی سفارت خانے کے جاری کردہ بیان کے مطابق امریکا اس شراکت داری کو مزید مستحکم کرنے کے لیے امریکی کمپنیوں اور پاکستانی شراکت داروں کے درمیان براہِ راست روابط قائم کرے گا۔
گزشتہ ماہ صدر ڈونلڈ ٹرمپ کے دستخط سے جاری ایگزیکٹو آرڈر کے تحت امریکا نے پاکستانی مصنوعات پر 19 فیصد جوابی ٹیکس عائد کیا تھا جو ابتدائی طور پر تجویز کردہ 29 فیصد سے نمایاں طور پر کم ہے۔
یہ شرح بھارت (50 فیصد)، بنگلہ دیش، ویتنام اور سری لنکا (20، 20 فیصد) کے مقابلے میں بھی کم ہے۔
ملاقات کے دوران بیکر نے پاکستان کے توانائی شعبے میں امریکی سرمایہ کاری کے لیے نمایاں مواقع کو اجاگر کیا۔
انہوں نے کہا کہ امریکا پاکستان کے ساتھ تعاون کے لیے پرعزم ہے۔ امریکی سفارت خانہ ایکسپلوریشن اینڈ پروڈکشن (ای اینڈ پی) شعبے میں امریکی کمپنیوں اور ان کے پاکستانی شراکت داروں کے درمیان براہِ راست روابط کے قیام میں فعال کردار ادا کرے گا۔
دریں اثنا وفاقی وزیر علی پرویز ملک نے امریکی سرمایہ کاروں کی گہری دلچسپی کا خیرمقدم کیا اور آنے والے مواقع کی تفصیلات فراہم کیں۔
پرویز ملک نے کہا کہ حکومت آف شور اور آن شور آئل و گیس ایکسپلوریشن بلاکس کے لیے بڈنگ راؤنڈ کا آغاز کررہی ہے جو بین الاقوامی شراکت داروں کے لیے بہترین موقع ہے۔
انہوں نے کہا کہ پاکستان کے پاس شیل آئل اور گیس سمیت بڑے وسائل موجود ہیں، جنہیں قابلِ عمل ذخائر میں تبدیل کرنا حکومت کا ہدف ہے، اور امریکی کمپنیوں کے ساتھ معلوماتی تبادلہ پہلے ہی جاری ہے۔
ناظمہ الامور بیکر نے اس بات پر زور دیا کہ امریکا اور پاکستان کے درمیان انسدادِ دہشت گردی پر مکالمہ ہو چکا ہے، اب ہم اس شراکت داری کو اقتصادی میدان میں بھی آگے بڑھانا چاہتے ہیں۔
ملاقات کا اختتام توانائی شعبے میں تعاون کو وسعت دینے، امریکی ٹیکنالوجی اور سرمایہ کاری کو بروئے کار لا کر دونوں ممالک کی معیشت اور توانائی کی ترقی کو فروغ دینے کے مشترکہ عزم پر ہوا۔
Comments
Comments are closed.