شمالی چین میں اچانک سیلاب سے 8 افراد ہلاک

چین کے سرکاری میڈیا کے مطابق شمالی علاقے میں اچانک آنے والے سیلاب کے باعث کم از کم 8 افراد ہلاک اور 4 لاپتہ ہوگئے ہیں۔ یہ واقعہ ہفتہ کی شب 10 بجے کے قریب اس وقت پیش آیا جب اندرونی منگولیا کے چراگاہی علاقے میں ایک دریا کی حفاظتی بند ٹوٹ گئی اور پانی نے بایان نور شہر کے مضافات میں کیمپنگ کرنے والے 13 افراد کو بہا لیا۔ حکام کے مطابق صرف ایک شخص کو زندہ بچایا جا سکا۔

چین جولائی سے غیر معمولی بارشوں اور موسمی شدت کا سامنا کر رہا ہے، جہاں مشرقی ایشیائی مون سون شمال اور جنوب میں رکا ہوا ہے اور بار بار طوفانی بارشیں ہو رہی ہیں۔ ماہرین موسمیات کے مطابق یہ تبدیلیاں ماحولیاتی تغیرات یعنی کلائمٹ چینج سے جڑی ہیں جو حکام کے لیے ایک بڑا امتحان بن گئی ہیں۔ اچانک آنے والے سیلاب نہ صرف ہزاروں افراد کو بے گھر کر رہے ہیں بلکہ اربوں ڈالر کے معاشی نقصانات کا بھی خطرہ ہے۔

بایان نور چین کا ایک اہم زرعی اور تیل و اناج پیدا کرنے والا مرکز ہے، جہاں بھیڑوں کی افزائش اور پروسیسنگ بھی کی جاتی ہے۔

یاد رہے کہ گزشتہ ماہ بیجنگ میں ہونے والی شدید بارش سے 44 افراد جاں بحق اور 70 ہزار سے زائد افراد نقل مکانی پر مجبور ہوگئے تھے۔ مرکزی حکومت اب تک آفات سے نمٹنے کے لیے 5.8 ارب یوآن کی امداد جاری کر چکی ہے۔