پاکستان اور مائیکرونیشیا کے درمیان سفارتی تعلقات قائم

پاکستان اور مغربی بحرالکاہل میں واقع ایک جزیرہ ملک مائیکرونیشیا کی وفاقی ریاستوں نے جمعرات کو نیویارک میں ایک تقریب میں سفارتی تعلقات قائم کر لیے ہیں۔

اقوام متحدہ میں پاکستان کے مستقل نمائندے سفیر عاصم افتخار احمد اور مائیکرونیشیا کی وفاقی ریاستوں کے ہم منصب سفیر جیم ایس لپوے نے دونوں ممالک کے درمیان تعلقات کو باضابطہ بنانے کے لیے مشترکہ اعلامیے پر دستخط کیے۔

اقوام متحدہ میں پاکستان کے مشن میں ہونے والی اس معاہدے پر دستخط کی تقریب میں دونوں ممالک کے سفارت کاروں نے شرکت کی جن میں نائب مستقل نمائندے، سفیر عثمان جدون بھی شامل تھے۔

تقریب سے خطاب کرتے ہوئے سفیر عاصم افتخار احمد نے کہا کہ وہ واقعی خوش ہیں کہ دونوں ممالک کے درمیان سفارتی تعلقات پاکستان کی یومِ آزادی کی سالگرہ پر قائم ہو رہے ہیں۔

انہوں نے کہا کہ یہ تعلقات انسانی وسائل کی مینجمنٹ، صلاحیت سازی اور ماحولیاتی تبدیلی کے میدان میں تعاون کے نئے راستے کھولیں گے۔ دونوں مشنز اقوامِ متحدہ میں بین الاقوامی امن اور سلامتی کے فروغ کے لیے قریبی تعاون کریں گے۔

عاصم افتخار نے بتایا کہ انہیں یہ جان کر خوشی ہوئی کہ مائیکرونیشیا 100واں ملک ہے جس کے ساتھ پاکستان نے تعلقات قائم کیے ہیں۔

اپنے خطاب میں سفیر لپوی نے دو طرفہ تعلقات کے ایک نئے باب کے آغاز پر خوشی کا اظہار کیا۔ انہوں نے کہا کہ پاکستان کے ساتھ دوستی اور شراکت داری کے سفر کے باضابطہ آغاز پر اپنی نمائندگی پر فخر محسوس کرتے ہیں۔

انہوں نے اقوامِ متحدہ میں اپنے ملک کے دفاتر کے قیام کے لیے پاکستان کی حمایت کا شکریہ ادا کیا اور پاکستانی ہم منصب کے ساتھ قریبی تعاون کے منتظر ہونے کا اظہار کیا۔

سفیر لپوی نے پاکستان کی یومِ آزادی پر مبارکباد بھی دی۔

تقریب سے قبل دونوں سفیروں کے درمیان ایک مختصر ملاقات بھی ہوئی، جس میں دوطرفہ اور اقوامِ متحدہ میں تعاون کے ممکنہ شعبوں پر بات چیت کی گئی۔