کریسنٹ اسٹار انشورنس، ایس جی پاور لمیٹڈ میں 38 فیصد حصص حاصل کرنے کا خواہاں

کریسنٹ اسٹار انشورنس لمیٹڈ (سی ایس آئی ایل) نے ایس جی پاور لمیٹڈ کے جاری اور ادا شدہ سرمایہ کے تقریباً 6.78 ملین شیئرز، جو ہدف کمپنی کے کل سرمایہ کا 38.05 فیصد ہیں، حاصل کرنے کا منصوبہ بنایا ہے۔

سی ایس آئی ایل نے اس پیش رفت کا اعلان بدھ کو پاکستان اسٹاک ایکسچینج کو جاری کردہ نوٹس میں کیا۔

انٹرمارکیٹ سیکیورٹیز لمیٹڈ جو اس پیشکش کے لیے مقرر کردہ منیجر ہے نے نوٹس میں کہا کہ خریداروں کی جانب سے ہمیں یہ اعلان کرتے ہوئے خوشی ہے کہ ہم ایس جی پاور لمیٹڈ کے تقریباً 6,785,236 عام شیئرز حاصل کرنے کے ارادے کا عوامی نوٹس پیش کر رہے ہیں، جو ہدف کمپنی کے کل جاری اور ادا شدہ سرمایہ کا تقریباً 38.05 فیصد ہے۔

اس حصول کو تمام ضروری قانونی منظوریوں، بشمول سیکیورٹیز اینڈ ایکسچینج کمیشن آف پاکستان (ایس ای سی پی) کی منظوری، کے تابع رکھا گیا ہے۔

نوٹس کے مطابق سی ایس آئی ایل نے یہ حق بھی محفوظ رکھا ہے کہ وہ پیشکش واپس لے سکتی ہے۔

کرسنٹ اسٹار انشورنس لمیٹڈ ایک رجسٹرڈ انشورر ہے جو ایس ای سی پی کے تحت کام کرتا ہے اور اس کا ادا شدہ سرمایہ 1,077 ملین روپے ہے۔ یہ کمپنی 1957 میں قائم ہوئی اور پاکستان بھر میں موٹر، ہیلتھ، فائر، میرین، انجینئرنگ، ٹریول، لائیو اسٹاک، فصل اور دیگر عمومی انشورنس کے کاروبار میں سرگرم ہے۔

دریں اثنا، ایس جی پاور لمیٹڈ پاکستان میں 10 فروری 1994 کو کمپنیز آرڈیننس، 1984 کے تحت رجسٹرڈ کی گئی تھی اور یہ اپنی وابستہ کمپنی ایس جی الائڈ بزنسز لمیٹڈ کو بجلی پیدا کرنے اور فراہم کرنے کے کاروبار میں ملوث ہے۔