صدر، وزیراعظم اور افواج پاکستان کا کشمیریوں کے حقِ خودارادیت کی بھرپور حمایت کا عزم

صدر آصف علی زرداری اور وزیرِ اعظم شہباز شریف نے کشمیری عوام کی قربانیوں کو خراجِ تحسین پیش کرتے ہوئے اُن کے حقِ خودارادیت کی جدوجہد کے لیے پاکستان کی اخلاقی، سیاسی اور سفارتی حمایت کے عزم کا اعادہ کیا ہے۔

لائن آف کنٹرول (ایل او سی) کے دونوں جانب اور دنیا بھر میں مقیم کشمیری آج یومِ استحصال منا رہے ہیں، اس عزم کے ساتھ کہ کشمیریوں کی منصفانہ جدوجہد کی حمایت جاری رکھی جائے گی۔

یاد رہے کہ 5 اگست 2019 کو بھارتی حکومت نے آئین کے آرٹیکل 370 اور 35-اے کو ختم کر کے جموں و کشمیر کی خصوصی حیثیت کو ختم کر دیا تھا، اور ایک غیر قانونی فوجی و پولیس محاصرہ نافذ کر دیا تھا۔ پاکستان نے ہمیشہ کشمیریوں کی اخلاقی، سفارتی اور سیاسی حمایت کی ہے۔

صدر اور وزیر اعظم نے اپنے پیغامات میں عالمی برادری سے مطالبہ کیا کہ وہ بھارت پر دباؤ ڈالے کہ وہ انسانی حقوق کی خلاف ورزیاں بند کرے، 5 اگست 2019 کے یکطرفہ اور غیرقانونی اقدامات واپس لے، اور اقوامِ متحدہ کی قراردادوں پر عمل کرے۔

صدر آصف زرداری نے کہا کہ بھارت کا مقصد متنازعہ حیثیت کو تبدیل کر کے کشمیریوں کے حقِ خودارادیت کو کمزور کرنا ہے۔

وزیرِ اعظم شہباز شریف نے کہا کہ یومِ استحصال بھارت کے امن دشمن رویے اور ظلم و جبر کی پالیسی کی یاد دلاتا ہے۔ انہوں نے کہا کہ کشمیری قیادت اور کارکنان کی گرفتاریوں کے باوجود کشمیریوں کا عزم کمزور نہیں ہوا۔

ڈپٹی وزیر اعظم و وزیر خارجہ سینیٹر اسحاق ڈار نے ویڈیو پیغام میں کہا کہ بھارت 78 برسوں سے کشمیریوں کو ان کا حقِ خودارادیت دینے سے انکار کر رہا ہے، اور 5 اگست 2019 کے بعد سے ظلم، آبادیاتی تبدیلی، میڈیا پر پابندیوں اور سیاسی گرفتاریوں کے ذریعے آواز دبانے کی کوشش کی جا رہی ہے۔

انہوں نے عالمی برادری سے مطالبہ کیا کہ وہ کشمیری عوام کو اقوامِ متحدہ کی قراردادوں کے مطابق حقِ خودارادیت دلوانے میں کردار ادا کرے۔

پاک فوج کے سپہ سالار فیلڈ مارشل سید عاصم منیر، چیئرمین جوائنٹ چیفس آف اسٹاف کمیٹی جنرل ساحر شمشاد مرزا، چیف آف نیول اسٹاف ایڈمرل نوید اشرف، چیف آف ایئر اسٹاف ایئر چیف مارشل ظہیر احمد بابر سدھو اور تمام مسلح افواج نے بھی کشمیری عوام کے ساتھ اپنی مکمل یکجہتی کا اظہار کیا۔

آئی ایس پی آر کے مطابق، پاکستان کی مسلح افواج کشمیریوں کی جائز اور قانونی جدوجہد کی مکمل حمایت کرتی ہیں، جو اقوامِ متحدہ کی قراردادوں اور بین الاقوامی قانون کے مطابق ہے۔

بیان میں کہا گیا کہ جنوبی ایشیا میں پائیدار امن تبھی ممکن ہے جب مسئلہ کشمیر کشمیری عوام کی امنگوں اور اقوامِ متحدہ کی قراردادوں کے مطابق حل ہو۔