گرڈ کی بحالی میں تاخیر، وزیر توانائی کا ذمہ داروں کے خلاف کارروائی کا حکم

وفاقی وزیر برائے پاور ڈویژن سردار اویس احمد خان لغاری نے جمعرات کے روز 220 کے وی داؤدخیل-بنوں ٹرانسمیشن لائن کی بحالی میں تاخیر پر شدید برہمی کا اظہار کیا اور متعلقہ افسران کے خلاف محکمانہ کارروائی کی ہدایت کی۔

220 کے وی چشمہ-بنوں لائن کے ٹرانسمیشن ٹاورز گرنے کے واقعے کا نوٹس لیتے ہوئے وزیر توانائی نے ذمہ دار اہلکاروں کے خلاف کارروائی کا حکم دیا اور ہدایت کی کہ دہشت گردی کے باعث سات مقامات پر متاثر ہونے والی داؤدخیل-بنوں لائن کی مکمل بحالی 4 اگست تک ہر صورت یقینی بنائی جائے۔

وفاقی وزیر نے مرمتی ٹیموں کی تعداد فوری طور پر تین سے بڑھا کر سات کرنے اور چشمہ-بنوں لائن کو دریا کے کنارے سے ہٹانے کی ہدایت کی تاکہ مستقبل میں اس طرح کی مزید رکاوٹوں سے بچا جا سکے۔ انہوں نے زور دیا کہ دونوں ٹرانسمیشن لائنیں آئندہ ہر حال میں فعال رہنی چاہئیں۔