سی سی ایل ہولڈنگ کا مچلز فروٹ فارمز میں 26 فیصد سے زائد حصص کے حصول کا اعلان

سی سی ایل ہولڈنگ (پرائیویٹ) لمیٹڈ نے مچلز فروٹ فارمز لمیٹڈ (ایم ایف ایف ایل)، جو پاکستان کی قدیم ترین لسٹڈ ایف ایم سی جی کمپنیوں میں سے ایک ہے، کے 26.26 فیصد تک حصص کے حصول کے لیے پبلک اناؤنسمنٹ آف انٹینشن (پی اے آئی) جمع کرا دیا۔

عارف حبیب لمیٹڈ، جو اس پیشکش کا منیجر ہے، نے پیر کو پاکستان اسٹاک ایکسچینج (پی ایس ایکس) کو جاری نوٹس میں اس پیشرفت سے آگاہ کیا۔

عوامی پیشکش کے مطابق، کمپنی 6,007,632 عام حصص فی شیئر 232.75 روپے کی قیمت پر خریدنے کی خواہشمند ہے۔

یہ عوامی پیشکش سی سی ایل ہولڈنگ کے مچلز میں 47.48 فیصد حصص کے پہلے سے حاصل کردہ شیئرز کے بعد آیا ہے۔ اس میں 40.63 فیصد شیئرز مچلز کے اسپانسرز سے 14 مئی 2025 کو شیئر پرچیز ایگریمنٹ (ایس پی اے) کے تحت فی شیئر 180 روپے میں حاصل کیے گئے، جبکہ اضافی 6.85 فیصد 23 جولائی 2025 کو ادارہ جاتی اور فیملی شیئر ہولڈرز، جن میں کمپنی کے چیئرمین سید بابر علی کی قائم کردہ بابرعلی فاؤنڈیشن اور آئی جی آئی انویسٹمنٹس (پرائیویٹ) لمیٹڈ شامل ہیں، سے گفت و شنید کے تحت فی شیئر 232.75 روپے کی بلند شرح پر خریدے گئے۔

اس پیشکش کے ذریعے، سی سی ایل ہولڈنگ مچلز میں اپنی کل شیئر ہولڈنگ 73 فیصد سے زائد تک بڑھانے کا ارادہ رکھتی ہے۔

سی سی ایل ہولڈنگ اپنی مکمل ملکیتی ذیلی کمپنی، سی سی ایل فارماسیوٹیکلز (پرائیویٹ) لمیٹڈ، کی ہولڈنگ کمپنی ہے، جو بنیادی طور پر برانڈڈ جنیرک فارماسیوٹیکلز اور کنزیومر ہیلتھ پروڈکٹس کی تیاری اور مارکیٹنگ میں مصروف ہے۔

دریں اثنا، مچلز فروٹ فارمز لمیٹڈ، جو پاکستان میں فارم اور کنفیکشنری مصنوعات بنانے والی کمپنی ہے، کی تاریخ 1933 سے شروع ہوتی ہے۔ آزادی کے بعد کمپنی کا نام انڈین ملڈورا فروٹ فارمز سے مچلز فروٹ فارمز لمیٹڈ میں تبدیل کر دیا گیا۔

کمپنی نے 1993 میں عوامی پیشکش کی اور 1996 میں اسٹاک ایکسچینج میں لسٹڈ ہوئی۔ کمپنی کی بنیادی سرگرمیاں مختلف زرعی اور کنفیکشنری مصنوعات کی تیاری اور فروخت پر مشتمل ہیں، جن میں مشروبات، کیچپ اور ساسز، پریزرو، ریڈی ٹو کک اور ریڈی ٹو ایٹ فوڈ رینج وغیرہ شامل ہیں۔