روس کا کیف پر رات گئے فضائی حملہ، آٹھ افراد زخمی

روسی فضائی حملے میں یوکرین کے دارالحکومت کیف میں پیر کی رات آٹھ افراد زخمی ہو گئے، جن میں ایک تین سالہ بچہ بھی شامل ہے۔ حکام کے مطابق حملہ پیر کی آدھی رات کے بعد ہوا، زخمیوں میں سے چار کو اسپتال منتقل کیا گیا ہے جبکہ ایک کی حالت تشویشناک بتائی جا رہی ہے۔

کیف کی فوجی انتظامیہ کے سربراہ تیمور ٹکچینکو نے ٹیلیگرام پر بتایا کہ تمام زخمی دارنیسکی ضلع کی ایک کثیر المنزلہ عمارت کے رہائشی ہیں۔ کیف کے میئر ویتالی کلیچکو کے مطابق دھماکے کی لہر نے عمارت کی چھٹی سے گیارہویں منزل تک کی کھڑکیاں توڑ دیں۔

رات بھر کیف سمیت یوکرین کے بیشتر علاقے فضائی حملے کے الرٹ پر رہے کیونکہ یوکرینی فضائیہ نے روسی میزائل اور ڈرون حملوں کا انتباہ دیا تھا۔

پولینڈ کی سرحد کے قریب مغربی یوکرین میں میزائل حملوں کے خطرے کے باعث پولش فضائیہ نے اپنے فضائی حدود کی حفاظت کے لیے طیارے روانہ کیے۔

وسطی شہر کروپیونیتسکی پر بھی حملہ ہوا، علاقائی گورنر آندری ریکووچ نے بتایا کہ امدادی ٹیمیں جائے وقوعہ پر موجود ہیں اور نقصانات کے بارے میں تفصیلات بعد میں جاری کی جائیں گی۔ روس نے حملے پر کوئی تبصرہ نہیں کیا ہے۔