چناب لمیٹڈ اور جی او سی کا حصص کی قیمتوں میں غیر معمولی اتار چڑھاؤ سے لاعلمی کا اظہار

چناب لمیٹڈ نے پیر کے روز کہا ہے کہ اسے اپنے حصص کے حجم اور قیمت میں غیر معمولی اتار چڑھاؤ کے بارے میں کوئی علم نہیں ہے۔

اسی طرح کا بیان جی او سی نے بھی جاری کیا۔ دونوں کمپنیوں نے آج پاکستان اسٹاک ایکسچینج (پی ایس ایکس) کو الگ الگ نوٹسز میں یہ باتب بتائی ہے۔

چناب لمیٹڈ نے کہا کہ وہ کئی دنوں سے اس غیر معمولی پیش رفت کا مشاہدہ کر رہی ہے، جس دوران ٹریڈنگ 1 کروڑ 20 لاکھ شیئرز سے تجاوز کر گئی۔

کمپنی نے اسٹاک ایکسچینج سے درخواست کی کہ چونکہ ہمارے پاس کوئی مادی یا قیمت پر اثر انداز ہونے والی معلومات نہیں ہیں، آپ سے گزارش ہے کہ معاملے کی تحقیقات کریں اور ہمیں بھی آگاہ کریں۔

ادھر جی او سی نے کہا کہ اس کے پاس اپنی کمپنی کے شیئرز کی قیمت میں ہونے والی تبدیلی سے نمٹنے کا کوئی طریقہ نہیں ہے۔

نوٹس میں کہا گیا کہ ہم یہ بھی واضح کرنا چاہتے ہیں کہ ہمیں کسی ایسے سبب کا علم نہیں ہے جس کی وجہ سے کمپنی کے شیئر کی قیمت میں اضافہ ہوا ہو۔

چناب لمیٹڈ 1985 میں پاکستان میں ایک نجی لمیٹڈ کمپنی کے طور پر قائم ہوئی اور بعد میں اسے پبلک لمیٹڈ کمپنی میں تبدیل کر دیا گیا۔ کمپنی ویلیو ایڈیڈ فیبرک، ٹیکسٹائل میڈ اپس، اور کیژول و فیشن ملبوسات کی برآمدات کے ساتھ ساتھ مقامی مارکیٹ میں ٹول مینوفیکچرنگ میں بھی مصروف ہے۔

جی او سی 1964 میں پاکستان میں ایک نجی لمیٹڈ کمپنی کے طور پر قائم ہوئی اور 1986 میں پبلک لمیٹڈ کمپنی میں تبدیل ہوئی۔ کمپنی کی بنیادی سرگرمی کرکٹ بالز، ہاکی اسٹکس اور دیگر معیاری اسپورٹس سامان کی تیاری اور فروخت ہے۔