جنوبی کوریا میں مسلسل تیسرے روز طوفانی بارشیں، ہزاروں افراد پناہ لینے پر مجبور

جنوبی کوریا میں مسلسل تیسرے روز موسلا دھار بارشوں کے باعث 5,000 سے زائد افراد کو پناہ گاہوں میں منتقل ہونا پڑا ہے، جبکہ طوفانی بارشوں سے کم از کم چار افراد ہلاک اور املاک و بنیادی ڈھانچے کو نقصان پہنچا ہے۔

وزارتِ سلامتی نے جمعہ کو بتایا کہ ملک کے بیشتر مغربی اور جنوبی حصوں میں طوفانی بارشوں کی وارننگز بدستور نافذ ہیں اور محکمہ موسمیات نے ہفتے تک لینڈ سلائیڈنگ اور سیلاب کے خطرے کے پیشِ نظر انتہائی احتیاط برتنے کی ہدایت دی ہے۔

جنوب کے کچھ حصوں، بشمول گوانگجو شہر، میں پچھلے 24 گھنٹوں کے دوران 400 ملی میٹر (16 انچ) سے زیادہ ریکارڈ بارش ہوئی ہے۔

چار افراد ہلاک ہو گئے جبکہ ایک شخص لاپتہ ہے۔ وزارت نے بتایا کہ دو افراد سیلابی سڑکوں پر گاڑیوں میں پھنس کر ہلاک ہوئے، جبکہ ایک شخص وسطی جنوبی چونگ چیونگ صوبے میں زیرِ زمین تہہ خانے میں پانی بھرنے سے جان سے گیا۔

فائر ایجنسی کے حکام کے مطابق بدھ کے روز اوسّان میں، جو سیول سے تقریباً 44 کلومیٹر جنوب میں واقع ہے، 10 میٹر اونچی دیوار گرنے سے ایک گاڑی پر دب کر ڈرائیور بھی ہلاک ہو گیا۔

جنوبی کوریا کے صدر لی جے میونگ، جو آفات کی روک تھام اور ردعمل میں حکومت کے کردار کو بڑھانے پر زور دیتے رہے ہیں، نے کہا کہ اگرچہ قدرتی آفات کو روکنا مشکل ہے، لیکن نقصان کا اندازہ لگانے اور عوام کو بروقت آگاہ کرنے کے لیے مزید اقدامات کیے جا سکتے ہیں۔

انہوں نے جمعہ کو موسم سے متعلق ہنگامی اجلاس میں کہا کہ میں دیکھ رہا ہوں کہ کچھ واقعات میں جانیں ضائع ہوئیں کیونکہ ردِعمل کمزور تھا، حالانکہ صورتحال کا اندازہ لگایا جا سکتا تھا۔