وفاقی چیمبر کا پاک، برطانیہ معاہدے کا خیرمقدم

فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے نائب صدر محمد امان پراچہ نے زور دیا ہے کہ برطانیہ کے ساتھ تجارتی تعلقات کو مضبوط بنانا پاکستان اور اس کی صنعتوں کے لیے ایک قیمتی متبادل منڈی فراہم کر سکتا ہے، جو پائیدار سماجی و معاشی ترقی، معیاری صنعتی پیش رفت اور برآمدات میں اضافے کا باعث بنے گا۔

پاکستان اور برطانیہ کے درمیان دو طرفہ تجارت کے فروغ اور چیلنجز کے حل کے لیے طے پانے والے معاہدے کا خیرمقدم کرتے ہوئے انہوں نے اسے دونوں ممالک کے تجارتی تعلقات کے لیے ایک مثبت قدم قرار دیا۔

انہوں نے بتایا کہ یہ معاہدہ پاکستان کے وفاقی وزیر تجارت جام کمال خان اور برطانوی وزیر ڈگلس الیگزینڈر کے درمیان طے پایا۔ یہ دونوں ممالک کے درمیان پہلا اعلیٰ سطح کا تجارتی معاہدہ ہے جو پاکستانی کابینہ کی منظوری کے بعد حتمی شکل دی گئی۔

انہوں نے مزید کہا کہ یہ معاہدہ پاکستان اور برطانیہ کے درمیان دوطرفہ اقتصادی تعاون کو ادارہ جاتی شکل دینے کی جانب ایک اہم قدم ہے۔ نائب صدر نے کہا کہ معاہدے کے بعد دونوں ممالک کو تجارتی مواقع تلاش کرنے، رکاوٹیں دور کرنے اور باہمی سرمایہ کاری کو فروغ دینے پر توجہ دینی چاہیے۔

ایف پی سی سی آئی کے نائب صدر نے ایک بار پھر اس بات پر زور دیا کہ برطانیہ کے ساتھ تجارتی توسیع پاکستان کی صنعتوں کے لیے ایک امید افزا منڈی کھول سکتی ہے۔ انہوں نے کہا کہ پاکستانی نژاد برطانوی سرمایہ کار بھی اس عمل میں اہم کردار ادا کر سکتے ہیں۔ امان پراچہ نے نشاندہی کی کہ اس وقت دونوں ممالک کے درمیان دو طرفہ تجارت کا تخمینہ 4.7 ارب پاؤنڈ ہے، تاہم مختلف شعبوں میں تعاون بڑھا کر دونوں ممالک باہمی فوائد حاصل کر سکتے ہیں۔

دوطرفہ تجارت کے فروغ کے لیے انہوں نے تجویز دی کہ دونوں حکومتیں ترجیحی تجارتی معاہدوں یا آزاد تجارتی معاہدوں کے حصول کے لیے مشترکہ اقدامات کریں، کاروباری وفود کا باقاعدہ تبادلہ کیا جائے، ملکوں کے لحاظ سے تجارتی نمائشیں اور مصنوعات کے میلوں کا انعقاد کیا جائے اور تمام مشاورت میں ایف پی سی سی آئی کی قیادت کو شامل رکھا جائے۔