پاکستان کا انڈر-18 ایشیا کپ کا فائنل جینتے کا خواب ٹوٹ گیا، جاپان چیمپئن بن گیا

پاکستان کا ایشیا ہاکی کپ 2025 میں شاندار سفر اتوار کے روز افسوسناک انجام کو پہنچا، جب فائنل میں جاپان نے 0-3 سے شکست دے کر گرین شرٹس کی ٹائٹل جیتنے کی امیدوں پر پانی پھیر دیا۔ یہ میچ چین کے دازہو نیشنل ہاکی ٹریننگ سینٹر میں کھیلا گیا۔

پاکستان نے گروپ مرحلے میں ناقابلِ شکست رہتے ہوئے ملائیشیا کے خلاف سنسنی خیز پینلٹی شوٹ آؤٹ (4-3) سے سیمی فائنل جیتا تھا، جس کے بعد ٹیم فائنل میں بھرپور اعتماد کے ساتھ اتری۔ تاہم، جاپان نے نہ صرف میچ پر مکمل کنٹرول رکھا بلکہ اپنے مواقع کا بھرپور فائدہ اٹھاتے ہوئے شاندار انداز میں فتح حاصل کی۔

جاپان کے فوجیوارا یوما میچ کے اسٹار رہے، جنہوں نے دوسرے اور تیسرے کوارٹر میں دو گول کیے، جبکہ یاسوی تاتسواکی نے آخری کوارٹر میں گول کرکے پاکستان کی واپسی کے تمام دروازے بند کر دیے۔

اگرچہ پاکستان کو فائنل میں شکست ہوئی، لیکن ٹورنامنٹ کے دوران ٹیم کی مجموعی کارکردگی قابلِ تحسین رہی۔ گرین شرٹس نے گروپ مرحلے میں چین کو 2-1، بنگلہ دیش کو 6-3، سری لنکا کو 9-0، اور ہانگ کانگ کو 8-0 سے شکست دی، جس سے ان کی جارحانہ صلاحیت اور بینچ اسٹرینتھ کا بھرپور اظہار ہوا۔

سیمی فائنل میں ملائیشیا کے خلاف کامیابی کے بعد شائقین کو پہلی بار ٹائٹل جیتنے کی اُمید ہوئی تھی، لیکن جاپان کی منظم دفاعی حکمت عملی اور تیز رفتار کاؤنٹر اٹیکس نے فیصلہ کن کردار ادا کیا۔

پاکستان نے اگرچہ چاندی کا تمغہ حاصل کیا، مگر وہ ایشین یوتھ ہاکی میں ایک مضبوط حریف کے طور پر ابھر کر سامنے آیا ہے، جو مستقبل میں بہتر نتائج کی امید دلاتا ہے۔

تاہم، یہ بھی حقیقت ہے کہ پاکستان ایک ماہ کے اندر دو بڑے فائنلز ہار چکا ہے۔ گزشتہ ماہ، پاکستان کو ملائیشیا میں منعقدہ ایف آئی ایچ نیشنز کپ کے فائنل میں نیوزی لینڈ کے ہاتھوں 2-6 سے شکست کا سامنا کرنا پڑا تھا۔