یو اے ای نے پاکستانیوں کیلئے ویزا پالیسی میں نرمی کی یقین دہانی کرادی

متحدہ عرب امارات (یو اے ای) نے پاکستانی شہریوں کے لیے ویزا پالیسی کو آسان بنانے میں مکمل تعاون کی یقین دہانی کرائی ہے۔

یہ پیشرفت ابوظہبی میں پاکستان کے وزیر داخلہ محسن نقوی اور متحدہ عرب امارات کے نائب وزیراعظم و وزیر داخلہ لیفٹیننٹ جنرل شیخ سیف بن زاید النہیان کے درمیان ملاقات کے دوران سامنے آئی۔

ملاقات کے دوران دونوں رہنماؤں نے سیکیورٹی، انسداد منشیات، اسمگلنگ کی روک تھام اور غیر قانونی امیگریشن کی روک تھام کے شعبوں میں تعاون بڑھانے پر تبادلہ خیال کیا۔

اس موقع پر ٹیکنالوجی کے تبادلے پر بھی گفتگو ہوئی۔

دونوں فریقین نے پاکستانی شہریوں کو درپیش ویزا مسائل پر بھی تبادلہ خیال کیا۔

وزیر داخلہ نے کہا کہ بڑی تعداد میں پاکستانی متحدہ عرب امارات کی معیشت کو مضبوط بنانے میں اہم کردار ادا کررہے ہیں۔

سال 2024 میں سعودی عرب اور عمان کے بعد متحدہ عرب امارات پاکستانیوں کی امیگریشن کے لیے تیسرا مقبول ترین ملک رہا۔

اس موقع پر وزیر داخلہ نے ویزا پالیسی میں نرمی کی اہمیت پر زور دیا۔

ہم چاہتے ہیں کہ پاکستانی شہری آسانی سے یو اے ای آ سکیں۔ ویزا پالیسی میں نرمی سے بہت بڑا ریلیف ملے گا۔

قبل ازیں محسن نقوی نے یقین دہانی کرائی کہ پاکستانی پاسپورٹ کی عالمی درجہ بندی بہتر بنانے کے لیے اقدامات جاری ہیں اور آئندہ دو برسوں میں اس کی پوزیشن نمایاں طور پر بہتر ہو جائے گی جس پر پاکستانیوں کو اپنے سبز پاسپورٹ پر فخر محسوس ہوگا۔

ہیولی پاسپورٹ انڈیکس کے مطابق اس وقت پاکستانی پاسپورٹ دنیا کا چوتھا بدترین پاسپورٹ ہے جو صرف عراق، شام اور افغانستان سے بہتر درجے پر ہے۔