ماری انرجیز کی پاکستان بھر میں اہم تیل و گیس بلاکس میں شراکت

ماری انرجیز لمیٹڈ ، جو کہ ملک کی بڑی تیل و گیس تلاش و پیداوار (ای اینڈ پی) کمپنیوں میں سے ایک ہے، نے پاکستان میں تین تیل و گیس کے بلاکس میں شراکت داری کے لیے اورینٹ پیٹرولیم آئی این سی (او پی آئی) کے ساتھ معاہدے کر لیے ہیں۔

اس پیش رفت کا اعلان کمپنی نے جمعہ کے روز پاکستان اسٹاک ایکسچینج (پی ایس ایکس) کو ایک نوٹس کے ذریعے کیا۔

نوٹس میں کہا گیا کہ ہم یہ بتاتے ہوئے خوشی محسوس کر رہے ہیں کہ ماری انرجیز اور او پی آئی کے درمیان فارم آؤٹ معاہدے طے پا گئے ہیں جن کے تحت ماری انرجیز، او پی آئی سے درج ذیل مفادات حاصل کرے گی: (اے) خیبر پختونخوا میں واقع *مروت بلاک میں 45 فیصد ورکنگ انٹرسٹ اور آپریٹرشپ، (بی) بلوچستان میں واقع ہرنائی ساؤتھ بلاک میں 45 فیصد ورکنگ انٹرسٹ اور آپریٹرشپ، (سی) پنجاب میں واقع رتانہ ڈی اینڈ پی لیز میں 20 فیصد نان آپریٹنگ ورکنگ انٹرسٹ۔

ماری انرجیز نے مزید کہا کہ یہ حصول حکومتی منظوری، اسائنمنٹ ڈیڈز پر دستخط، اور دیگر ضروری ضوابط کی تکمیل سے مشروط ہے۔

بیان میں کہا گیا کہ یہ معاہدہ ماری انرجیز کے اس عزم کی عکاسی کرتا ہے کہ وہ ملک بھر کے بقیہ ممکنہ آن شور علاقوں میں وسعت کے ذریعے اپنے اپ اسٹریم پورٹ فولیو کو مضبوط بنانا چاہتی ہے، مقامی تیل و گیس کی تلاش و ترقیاتی سرگرمیوں کی حمایت کرنا چاہتی ہے، اور پاکستان کی توانائی کی سلامتی میں اپنا کردار ادا کرنا چاہتی ہے۔

ماری انرجیز ملک میں قدرتی گیس کی دوسری بڑی پیداوار کنندہ ہے۔ یہ ایک مربوط تیل و گیس تلاش و پیداوار کمپنی ہے جس کی تلاش کی کامیابی کی شرح تقریباً 70 فیصد ہے، جو کہ قومی سطح پر 30 فیصد اور عالمی سطح پر 14 فیصد کے انڈسٹری اوسط سے کہیں زیادہ ہے۔

کمپنی سندھ کے ضلع ڈہرکی میں واقع ماری گیس فیلڈ میں پاکستان کے سب سے بڑے گیس ذخیرے کی آپریٹر بھی ہے۔