نان فائلرز کیلئے بینکنگ پابندیاں سخت ، مقررہ حد سے زائد رقم نکالنے پر پابندی عائد

نان فائلرز کے اقتصادی لین دین پر پابندی عائد کرنے کے لیے ترمیم شدہ فنانس بل 2025-26 کے تحت بینکوں کو ہدایت دی گئی ہے کہ وہ نااہل افراد (نان فائلرز) کے کسی بھی بینک اکاؤنٹ سے مقررہ حد سے زائد رقم نقد نکلوانے کی اجازت نہ دیں۔

یہ نیا قانون یکم جولائی 2025 سے نان فائلرز پر نافذ العمل ہوگا۔

ترمیم شدہ فنانس بل (2025-26) کے تحت سیکشن 114سی (بعض افراد پر اقتصادی لین دین کی پابندی) کو نظرثانی کے بعد شامل کیا گیا ہے۔

اصل فنانس بل میں حکومت نے تجویز دی تھی کہ بینکنگ کمپنیاں ان افراد کے نام پر — جن کی نشاندہی بورڈ کرے گا — کوئی نیا کرنٹ، سیونگ یا انویسٹر پورٹ فولیو سیکیورٹیز اکاؤنٹ نہ کھولیں اور نہ ہی پہلے سے موجود ایسے اکاؤنٹس کو برقرار رکھیں، البتہ آسان اکاؤنٹ اور پنشنرز اکاؤنٹ اس پابندی سے مستثنیٰ ہوں گے۔

اصل بل میں یہ بھی شامل کیا گیا تھا کہ بینکنگ کمپنیاں کسی بھی شخص کے بینک اکاؤنٹس سے مقررہ حد سے زائد نقد رقم نکالنے کی اجازت نہیں دیں گی اور یہ حد وقتاً فوقتاً بورڈ کی جانب سے نوٹیفائی کی جائے گی۔

فنانس بل 2025-26 میں ترمیم کے بعد اس شق کو ایک نئی ذیلی شق سے بدل دیا گیا ہے، جس کے تحت ”بینکنگ کمپنی کسی بھی شخص کے بینک اکاؤنٹ سے مقررہ حد (جیسا کہ پندرہویں شیڈول میں درج ہے) سے زائد نقد رقم نکالنے کی اجازت نہیں دے گی“، ترمیم شدہ فنانس بل میں شامل کیا گیا۔

ترمیم شدہ فنانس بل میں ایک اور اہم تبدیلی کا انکشاف ہوا ہے جو پنشن سے متعلق ہے۔ اس کے مطابق، اگر کوئی فرد ”دیگر ذرائع سے آمدن“ کے تحت کسی انیوٹی یا پنشن کی مد میں آمدن حاصل کررہا ہے، تو ایسے فرد سے اس کی موصولہ انیوٹی یا پنشن پر اس ڈویژن کی شق (2) میں دی گئی شرح کے مطابق ٹیکس وصول کیا جائے گا۔

کاپی رائٹ بزنس ریکارڈر 2025