بیرونی قرضوں کی بھاری ادائیگیاں، زرمبادلہ ذخائر میں 2 ارب ڈالر سے زائد کی کمی ریکارڈ

اسٹیٹ بینک آف پاکستان کے زرمبادلہ ذخائر میں ایک ہی ہفتے کے دوران 2.6 ارب ڈالر سے زائد کی نمایاں کمی واقع ہوئی ہے جس کی بنیادی وجہ بیرونی قرضوں کی بھاری ادائیگیاں تھیں، تاہم توقع ہے کہ اسٹیٹ بینک دوبارہ استحکام حاصل کرے گا کیونکہ اسے 3 ارب ڈالر سے زائد کی تازہ رقوم موصول ہو چکی ہیں، جو اگلے ہفتے کے ذخائر کے اعداد و شمار میں ظاہر ہوں گی۔ جمعرات کو اسٹیٹ بینک کی جانب سے جاری کردہ ہفتہ وار رپورٹ کے مطابق 20 جون 2025 کو ختم ہونے والے ہفتے کے دوران، حکومت پاکستان کی بیرونی قرضوں کی ادائیگیوں، خاص طور پر کمرشل قرضوں کی واپسی کے باعث، اسٹیٹ بینک کے زرمبادلہ کے ذخائر میں 2.657 ارب ڈالر کی نمایاں کمی ہوئی۔ اس کمی کے بعد 20 جون 2025 تک اسٹیٹ بینک کے پاس موجود زرمبادلہ کے ذخائر کم ہو کر 9.065 ارب ڈالر رہ گئے، جو کہ 13 جون 2025 کو 11.72 ارب ڈالر تھے۔

تاہم اسٹیٹ بینک نے کہا کہ زرمبادلہ ذخائر میں نمایاں اضافہ ہوگا کیونکہ حالیہ دنوں میں بین الاقوامی مالیاتی اداروں سے 3 ارب ڈالر سے زائد کی رقوم بطور قرض اس کے اکاؤنٹ میں موصول ہوئی ہیں۔ اسٹیٹ بینک نے کہا ہے کہ موجودہ ہفتے کے دوران، حکومت پاکستان کو 3.1 ارب ڈالر کے مساوی کمرشل قرضے اور 50 کروڑ ڈالر سے زائد کے کثیرالجہتی قرضے موصول ہوئے ہیں۔

رپورٹنگ کے طریقہ کار کے مطابق یہ رقوم اسٹیٹ بینک کے زرمبادلہ ذخائر میں 27 جون 2025 کو ختم ہونے والے ہفتے کے اعداد و شمار میں شامل کی جائیں گی۔

جائزہ شدہ مدت کے دوران کمرشل بینکوں کے پاس موجود خالص زرمبادلہ کے ذخائر میں معمولی اضافہ ہوا، جو گزشتہ ہفتے کے اختتام پر 5.283 ارب ڈالر سے بڑھ کر 5.333 ارب ڈالر ہو گئے، یعنی 50 ملین ڈالر کا اضافہ ریکارڈ کیا گیا۔

چنانچہ اسٹیٹ بینک کے ذخائر میں بڑے پیمانے پر کمی کے باعث ملک کے مجموعی زرمبادلہ ذخائر میں 2.6 ارب ڈالر کی کمی واقع ہوئی۔ 20 جون 2025 تک ملک کے مجموعی زرمبادلہ ذخائر کم ہو کر 14.4 ارب ڈالر رہ گئے جو 13 جون 2025 کو 17 ارب ڈالر تھے۔

گورنر اسٹیٹ بینک جمیل احمد پر اعتماد ہیں کہ رواں مالی سال کے اختتام تک اسٹیٹ بینک کے زرمبادلہ ذخائر 14 ارب ڈالر تک پہنچ جائیں گے۔

تجزیہ کاروں کا کہنا ہے کہ سست رفتار غیر ملکی ترسیلات کے باوجود پاکستان نے رواں مالی سال کے دوران بیرونی قرضوں کی ادائیگی کامیابی سے انجام دی ہے۔