لیفٹیننٹ جنرل (ر) انور علی ماری انرجیز کے دوبارہ چیئرمین مقرر

ماری انرجیز لمیٹڈ (سابقہ ماری پٹرولیم کمپنی لمیٹڈ) کے بورڈ آف ڈائریکٹرز نے لیفٹیننٹ جنرل (ر) انور علی حیدر، ہلالِ امتیاز (ملٹری)، کو دوبارہ کمپنی کا چیئرمین مقرر کردیا ہے۔

ای اینڈ پی کمپنی نے یہ پیشرفت بدھ کو پاکستان اسٹاک ایکسچینج کو اپنے نوٹس میں شیئر کی۔

نوٹس میں کہا گیا کہ کمپنی یہ اطلاع دیتے ہوئے خوشی محسوس کررہی ہے کہ ماری انرجیز لمیٹڈ کے بورڈ آف ڈائریکٹرز نے اپنی 24 جون 2025 کو شام 3:30 بجے منعقدہ اجلاس میں لیفٹیننٹ جنرل (ر) انور علی حیدر، ہلالِ امتیاز (ملٹری)، منیجنگ ڈائریکٹر/چیف ایگزیکٹو آفیسر فوجی فاؤنڈیشن، کو بورڈ آف ڈائریکٹرز کا چیئرمین دوبارہ مقرر کر دیا ہے۔ یہ تقرری 24 جون 2025 سے مؤثر ہوگی۔

ماری انرجیز کی ویب سائٹ پر دستیاب معلومات کے مطابق لیفٹیننٹ جنرل (ر) انور علی حیدر منصوبہ بندی، تنظیم سازی اور انتظامی امور کا وسیع تجربہ رکھتے ہیں۔

پاکستانی فوج میں اپنے شاندار کیریئر کے دوران انہوں نے اہم کمانڈ، اسٹاف اور تربیتی عہدوں پر خدمات انجام دیں، اور اپنے کیریئر کے اختتام پر چیف آف آرمی اسٹاف کے پرنسپل اسٹاف آفیسر کے طور پر ایڈجوٹنٹ جنرل کے منصب پر فائز رہے۔

ویب سائٹ کے مطابق اس عہدے پر فائز رہتے ہوئے انہوں نے فوج اور قومی سطح پر کئی اہم فلاحی اقدامات اور بڑے تجارتی منصوبوں کی قیادت کی جن میں فوجی فاؤنڈیشن کمپنیز کی ترقی اور توسیع کے لیے حکمتِ عملی وضع کرنا اور آرمی ویلفیئر ٹرسٹ کے چیئرمین کی حیثیت سے خدمات انجام دینا شامل ہے۔

مزید یہ کہ انہوں نے اسپیشل انویسٹمنٹ فیسلیٹیشن کونسل (ایس آئی ایف سی) کی ایپکس کمیٹی کے رکن کے طور پر بھی خدمات انجام دیں۔

ماری انرجیز پاکستان میں قدرتی گیس پیدا کرنے والی دوسری سب سے بڑی کمپنی ہے۔ یہ ایک مربوط تیل و گیس کی تلاش و پیداوار کمپنی ہے، جس کا ایکسپلوریشن کامیابی کا تناسب تقریباً 70 فیصد ہے جو کہ قومی اوسط (تقریباً 30 فیصد) اور بین الاقوامی اوسط (تقریباً 14 فیصد) سے کہیں زیادہ ہے۔

یہ کمپنی سندھ کے علاقے دھڑکی میں واقع ماری گیس فیلڈ پر پاکستان کا سب سے بڑا گیس ذخیرہ چلا رہی ہے۔